Xitoyning Chendu shahrida bo‘lib o‘tayotgan avtosalonda Chery kompaniyasi o‘zining yangi krossoveri Xingtu ET5’ni namoyish etdi. Bu haqda ITHome ma’lum qildi.
Ma’lum qilinishicha, bu model dizayni, texnologiyasi va sun’iy intellekt asosidagi haydovchi yordamchi tizimlari bilan e’tibor qaratmoqda. Yangi ET5 yumaloq shakldagi old qismi, bo‘lingan faralari va uch oqimli chiziqni eslatuvchi chiroqlari bilan ajralib turadi. Orqa qismida esa to‘liq chiroq paneli, akula suzgichi shaklidagi antena va spoiler joylashgan. Modelning o‘lchamlari 4780×1890×1725 mm bo‘lib, g‘ildirak bazasi 2800 mmni tashkil etadi.
Quvvat tizimi
Avtomobil 1,5 litrli turbodvigatel asosida ishlovchi extended-range tizimiga ega. Ichki yonuv dvigateli 115 kVt quvvat ishlab chiqaradi, elektromotor esa 195 kVt quvvat va 324 Nm moment beradi. Mashina 0 dan 100 km/soat tezlikka 7,8 soniyada chiqadi. 32,66 kVt/soatlik LFP batareya yordamida sof elektr rejimida 205 km (CLTC standarti) yurish imkoniyati mavjud.
Salon va qulayliklar
Ichki makon oq va kulrang ranglarda bezatilgan. Uch ekranli tizim joriy etilgan: haydovchi uchun to‘liq raqamli panel, markaziy sensor ekran hamda yo‘lovchi uchun alohida displey. Rulda sensorli tugmalar va rollerlar o‘rnatilgan. Markaziy konsolda simsiz zaryadlash paneli, stakan qo‘ygich va ikki bo‘lakli qo‘ltiq qutisi mavjud.
Haydovchiga yordam tizimlari
Xingtu ET5 Chery va Horizon Robotics hamkorligida ishlab chiqilgan birinchi avtomobil bo‘ldi. Mashina HSD va Journey 6P tizimlari, tom qismida lazerli radar, 12 ta oddiy radar va yuqori aniqlikdagi kameralar bilan jihozlangan. Sun’iy intellekt asosidagi end-to-end boshqaruv arxitekturasi avtomobilni mustaqil ravishda yanada xavfsiz boshqarishga yo‘naltirilgan.
Avvalroq Kursiv Uzbekistan 16 ming dollarlik Chery Jetour Shanhai L7 Plus taqdim etilgani haqida xabar bergan edi.
