Hukumat qarori bilan ichki ishlar organlarining ayrim toifadagi xodimlari va pensionerlariga berilgan xizmat uylari xususiylashtiriladi. Bu haqda «O‘zA» xabar berdi.
Bu imtiyoz quyidagilarga taalluqli:
- 2022-yil 4-iyulgacha xizmat muddatini o‘tab pensiya olish huquqiga ega bo‘lgan yoki xizmat vaqtida kasallik sabab iste’foga chiqqan, o‘zi va turmush o‘rtog‘ining nomida shaxsiy uyi bo‘lmagan pensionerlar hamda vafot etgan pensionerlarning uy-joysiz oila a’zolari;
- xizmat davomida vafot etgan xodimlarning shaxsiy uy-joyi bo‘lmagan oila a’zolari.
Xizmat uylari kimlarga beriladi
Qonunchilikka ko‘ra, quyidagi soha vakillari xizmat turar joylari bilan ta’minlanadi:
- mehnat va aholini ijtimoiy muhofaza qilish muassasalarining bug‘qozon qurilmalari operatorlari;
- nasos stantsiyalari, yirik gidrouzellar va to‘g‘onlarga xizmat ko‘rsatuvchi navbatchi texniklar, mashinistlar, elektr texniklar;
- kommunal xizmat ko‘rsatishning suv oqizish-kanalizatsiya va gaz xo‘jaligi avariya-dispetcherlik xizmatlari ustalari, slesarlari;
- yo‘l oraliqlari ustalari, tuzatuvchilari;
- gazdan muhofaza qilish xizmati xodimlari;
- suv xo‘jaligi foydalanish uchastkalari boshliqlari, gidroinshootlarning tartibga soluvchilari, gidropostlarning kuzatuvchilari, uchastka gidrotexniklari va gidroo‘lchovchilari;
- kabelli (radiorele) kuchaytirish punktlariga xizmat ko‘rsatuvchi navbatchi texniklar, radio va televizion stansiyalar, qishloq joylardagi maxsus obyektlarga xizmat ko‘rsatuvchi elektr mexaniklar;
- elektr tarmoqlari va yordamchi stansiyalarning navbatchi muhandislari, kabelli taqsimlash tarmoqlarining navbatchi muhandislari va texniklari;
- Sog‘liqni saqlash vazirligining qishloq joylardagi davolash-profilaktika muassasalarining uchastka vrach-terapevtlari, pediatrlari;
- nogironlar va qariyalar uylarining hamda aqlan zaif bolalar uchun nogiron bolalar uylarining direktorlari, vrach, katta tibbiyot hamshiralari, shuningdek, ushbu bolalar uylarining tarbiyachilari, sanatoriylar va dam olish uylarining bosh vrachlari, vrachlari, xo‘jalik ishlari bilan shug‘ullanuvchi hamshiralari;
- oilaviy bolalar uyining tarbiyalash uchun ularga berilgan bolalar bilan birga yashovchi ota-ona-tarbiyachilari;
- o‘rmon, qo‘riqxona, zakaznik (daxlsiz o‘rmon qo‘riqxonasi), ovchilik xo‘jaliklarining direktorlari, o‘rmon xo‘jaligi xodimlari, o‘rmon kesuvchilari, yollangan ovchilari;
- boshqa joylardan vaqtinchalik taklif etilgan oliy toifali trenerlar va sport ustalari;
- harbiylashtirilgan qo‘riqlash va professional yong‘in xavfsizligi xodimlari;
- Qurolli kuchlar xodimlari;
- ichki ishlar organlarining xodimlari;
- prokuratura organlari xodimlari;
- tuman, shahar, viloyat sudlarining, Oliy sudi va harbiy sudlarining sudyalari;
- boshqa mintaqalardan ishga taklif qilingan Prezident Adminstratsiyasi, Oliy Majlis, Inson huquqlari, Vazirlar Mahkamasi, vazirliklar, idoralar va ularning hududiy bo‘linmalari apparatlarining mas’ul xodimlari;
- qishloq joylaridagi aloqa bo‘limlarining boshliqlari va boshliq o‘rinbosarlari.
Markaziy bank hisobotiga ko‘ra, joriy yilning birinchi yarmida ko‘chmas mulk bozorida ijara, yer va uy-joy narxlari pasaygan. Xususan, Toshkent shahrida 1 sotix (100 kv.m.) yer maydoni narxi 334 million so‘m atrofida bo‘lib, bu o‘tgan yilga nisbatan 2,5 foizga kamaygan.
Shu bilan birga, aprel oyida 1 kvadrat metr uy-joy narxi o‘rtacha 15,4 million so‘m atrofida bo‘lgan bo‘lsa, iyun yakuniga kelib bu ko‘rsatkich 14,9 million so‘mgacha pasaydi.
