Iordaniyaga vizasiz rejim, yangi ochilgan yerosti yo‘li, prezident tashriflari — 29-avgustning muhim yangiliklari
Texnikumlar uchun o‘quv yilining boshlanish sanasi, Iordaniyaga vizasiz rejim, bugun nishonlanadigan Mustaqillik bayrami, prezident tashriflari — Kursiv Uzbekistan muhim yangiliklarni bir joyga jamladi.
Texnikumlarda yangi o‘quv yili 3-sentabrdan boshlanadi
Oliy ta’lim, fan va innovatsiyalar vazirligi buyrug‘iga muvofiq, respublika kasbiy ta’lim muassasalarida 2025/2026-o‘quv yili 3-sentabrdan boshlanadi.
Mazkur qarorga ko‘ra, 9-sinf negizida shakllangan guruhlar hamda o‘rta va o‘rta maxsus kasbiy ta’limning 2 va 3-kurs talabalari uchun dars jarayonlari belgilangan sanada start oladi.
29-avgust kuni xorijiy valyutalarni qaysi banklarda qulay narxda almashtirish mumkin
Banklar 29-avgust uchun xorijiy valyutalarni ayirboshlash kurslarini yangiladi. Kursiv Uzbekistan eng yaxshi narxdagi xorijiy valyuta kurslari haqidagi ma’lumotlarni taqdim qiladi.
| Valyuta | Eng yuqori kurs (sotib olish) | Bank nomi |
|---|---|---|
| USD | 12 500 so‘m | «Turonbank» |
| EUR | 14 600 so‘m | «Infinbank» |
| RUB | 157 so‘m | «Infinbank» |
Sotish
| Valyuta | Eng yuqori kurs (sotib olish) | Bank nomi |
|---|---|---|
| USD | 12 480 so‘m | «SQB» |
| EUR | 14 300 so‘m | «NBU» |
| RUB | 147 so‘m | «Hamkorbank» |
Chempionlar ligasi: «Real Madrid» yana «Manchester Siti» bilan o‘ynaydi
28-avgustda Chempionlar ligasi guruh bosqichiga qur’a tashlash marosimi bo‘lib o‘tdi. Barcha jamoalar oldinda turgan 8 turdagi raqiblarini bilib olishdi.
O‘zbekistonda eng ko‘p kartoshka Samarqandda yetishtirilmoqda
2025-yilning yanvar – iyun oylarida mamlakatda 1,9 million tonna kartoshka yetishtirildi. Kartoshka yetishtirish umumiy hajmining eng yuqori ulushi o‘tgan yilning aynan shu davrida ham Samarqand viloyati (18,6 %) hissasiga toʻgʻri kelgan.
O‘zbekiston fuqarolariga 25-sentabrdan Iordaniyaga vizasiz rejim joriy etiladi
O‘zbekiston fuqarolari 25-sentabrdan boshlab Iordaniyada 30 kungacha vizasiz qolish huquqiga ega bo‘ladi. Bu haqda Tashqi ishlar vazirligi matbuot kotibi Ahror Burxonov Kursiv’ga ma’lum qildi.
Bugun Mustaqillikning 34 yillik bayrami nishonlanadi
Bugun, 29-avgust kuni O‘zbekiston mustaqilligining 34 yilligiga bag‘ishlangan bayram tadbiri o‘tkaziladi. Tadbirda prezident Shavkat Mirziyoyev ishtirok etadi.
Shuningdek, davlat rahbari Shahidlar xotirasi xiyobonida qatag‘on qurbonlarini yod etish marosimida ishtirok etadi hamda «Yangi O‘zbekiston» bog‘ida Mustaqillik monumenti poyiga gul qo‘yadi.
Shavkat Mirziyoyev Shahidlar xiyoboni va «Yangi O‘zbekiston» bog‘iga tashrif buyurdi — foto
Bugun, 29-avgust kuni Shavkat Mirziyoyev Shahidlar xotirasi xiyoboni va «Yangi O‘zbekiston» bog‘idagi Mustaqillik monumentiga tashrif buyurdi. Bu haqda prezident matbuot xizmati xabar berdi.
Yangi O‘zbekiston ko‘chasidagi yerosti avtomobil yo‘li ochildi
Prezident Shavkat Mirziyoyev Toshkent shahridagi Yangi O‘zbekiston ko‘chasida qurilgan yangi yerosti avtomobil yo‘lini ko‘zdan kechirdi.
Ushbu tunnel uzunligi 468 metr, kengligi 25 metr bo‘lib, bir soatda 10 mingdan ortiq avtomobil o‘tishi mumkin. Tunnel usti yashil hududga aylantirilib, «Yangi O‘zbekiston» bog‘i bilan Olimpiya shaharchasi o‘rtasida piyodalar uchun xavfsiz yo‘lak tashkil etildi.
UzAirports ilk bor Fitch’ning «BB» reytingiga ega bo‘ldi
Xalqaro reyting agentligi Fitch Ratings «Uzbekistan Airports» AJ kompaniyasiga ilk bor uzoq muddatli kredit reytingini berdi. Kompaniya «BB» darajasi, prognozi barqaror sifatida baholandi. Bu haqda agentlik rasmiy sahifasida e’lon qildi.
Ichki ishlar xodimlari va pensionerlariga xizmat uylari xususiylashtirib beriladi
Hukumat qarori bilan ichki ishlar organlarining ayrim toifadagi xodimlari va pensionerlariga berilgan xizmat uylari xususiylashtiriladi.
Bu imtiyoz quyidagilarga taalluqli:
- 2022-yil 4-iyulgacha xizmat muddatini o‘tab pensiya olish huquqiga ega bo‘lgan yoki xizmat vaqtida kasallik sabab iste’foga chiqqan, o‘zi va turmush o‘rtog‘ining nomida shaxsiy uyi bo‘lmagan pensionerlar hamda vafot etgan pensionerlarning uy-joysiz oila a’zolari;
- xizmat davomida vafot etgan xodimlarning shaxsiy uy-joyi bo‘lmagan oila a’zolari.
«Yevroosiyo banki» O‘zbekistondagi faoliyatini nega yakunlaganiga izoh berdi
Qozog‘istonning «Yevroosiyo Banki» O‘zbekistondagi faoliyatini yakunlagani haqida xabar berilgandi. Bu haqda bank matbuot xizmati ham ma’lum qildi.
Xabarga ko‘ra, bu qaror bankning avvalroq qabul qilingan strategiyasi, ya’ni resurslarni Qozog‘istonda biznesni rivojlantirishga yo‘naltirish rejasining mantiqiy davomi hisoblanadi.
Avvalroq Kursiv Uzbekistan 28-avgust kungi muhim xabarlar dayjestini yozgandi.
