Yevropa Konferensiyalar ligasi saralashining so‘nggi bosqichida Turkiyaning «Istanbul Bashakshehir» klubi safarda Ruminiyaning «Universitatya Krayova» jamoasiga mag‘lub bo‘lib, musobaqani tark etdi.
Dastlabki uchrashuvda o‘z maydonida 1:2 hisobida imkoniyatni boy bergan turk jamoasi javob o‘yinida ham muvaffaqiyat qozona olmadi. Davi Zelke 7-daqiqada hisobni ochgan bo‘lsa-da, mezbonlar Aleksandru Chikildau, Stefan Bayram va Stiven Nsimba kiritgan gollar evaziga 3:1 hisobida ustunlikni qo‘lga kiritdi.
Natijada «Istanbul Bashakshehir» ikki o‘yinda umumiy 2:5 hisobida mag‘lub bo‘ldi va guruh bosqichiga chiqish imkoniyatidan ayrildi.
O‘zbekiston terma jamoasi sardori Eldor Shomurodov uchrashuvni asosiy tarkibda boshlab, 70 daqiqa faol harakat qildi va sariq kartochka oldi. 63-daqiqada zaxiradan maydonga tushgan Abbosbek Fayzullayev ham jamoasiga yordam berishga urindi, biroq natijani o‘zgartira olmadi.
80-daqiqada Kristofer Operi qizil kartochka olib maydondan chetlatilishi turk jamoasining imkoniyatlarini yanada kamaytirdi. Shu tariqa «Bashakshehir» Yevropa Konferensiyalar ligasi mavsumini erta yakunladi.
Avvalroq Kursiv Uzbekistan Fayzullayev debyut qilgan o‘yinda «Bashakshehir» mag‘lub bo‘lgani haqida xabar bergan edi.
