Janubiy Koreya sobiq birinchi xonimi poraxo‘rlikda ayblandi

Janubiy Koreya sobiq prezidenti Yun Suk Yolning rafiqasi, sobiq birinchi xonim Kim Kon Xi poraxo‘rlik va moliyaviy firibgarlikda ayblanib sudga tortildi. Bu haqda Reuters agentligi ma’lum qildi.

Maxsus prokuratura ma’lumotiga ko‘ra, u 2010–2012-yillarda aksiyalar manipulyatsiyasi orqali 810 mln von (taxminan $583 ming) noqonuniy foyda olgan, shuningdek, Birlashish cherkovi amaldoridan 80 mln vonlik qimmatbaho sovg‘alar — Chanel sumkalari va olmos marjon — qabul qilganlikda gumon qilinmoqda.

Kim Kon Xi ayblovlardan so‘ng jamoatchilikdan uzr so‘rab, sudda «bahona qilmasdan» ishtirok etishini bildirdi.

Uning eri Yun Suk Yol aprel oyida konstitutsiyaga zid ravishda harbiy holat joriy etishga uringani uchun lavozimidan chetlashtirilgan va hozirda qo‘zg‘olon uyushtirish bo‘yicha sud qilinmoqda.

Shuningdek, sobiq bosh vazir Han Duk Su ham qo‘zg‘olonga sheriklikda ayblanib, unga nisbatan ham ayblov xulosasi e’lon qilindi.

Eslatib o‘tamiz, avvalroq Janubiy Koreya sobiq prezidentining rafiqasi hibsga olingani haqida yozgan edik.