Koreyaning K-water kompaniyasi O‘zbekistonda suv xo‘jaligini rivojlantirishga ko‘maklashadi. Kompaniya Jahon bankining O‘zbekistonda suv ta’minoti va kanalizatsiya xodimlarini o‘qitish bo‘yicha $400 minglik tenderida g‘olib chiqqan.
Yangi loyiha 17 oy davom etadi. Uning doirasida mutaxassislar tajribali murabbiylardan saboq olib, tajriba almashish imkoniyatiga ega bo‘ladi. Shuningdek, Janubiy Koreya kompaniyalari mahalliy bozorida faoliyat yuritishi mumkin bo‘ladi.
2022-yildan beri K-water Jahon banki bilan hamkorlikda ta’lim dasturlarini ishlab chiqib, mahalliy mutaxassislarni o‘qitib kelmoqda.
Kompaniya suvni boshqarish texnologiyalarini nafaqat O‘zbekistonda, balki Qirg‘iziston, Tojikiston, Qozog‘iston va Turkmanistonda ham joriy etishni rejalashtirmoqda.
Shuningdek, joriy yilning oktabr oyida Toshkentda Markaziy Osiyo mamlakatlari suv tashkilotlari va Jahon banki ishtirokida xalqaro konferensiya o‘tkaziladi.
Bundan avval Abu-Dabining TAQA kompaniyasi turli mamlakatlar, jumladan, O‘zbekiston va Marokashdagi suv loyihalariga milliardlab dollar sarmoya kiritishni rejalashtirayotgani haqida xabar berilgan edi.
Bu maqsad uchun kompaniya Ispaniyaning GS Inima kompaniyasini $1,2 milliardga sotib olish bo‘yicha kelishuvga erishdi. TAQA mazkur kompaniyani suv ta’minoti va tozalash sohasida xalqaro kengayishning asosiy vositasiga aylantirmoqchi.
