Meksika Senatida AQSh aralashuvi bo‘yicha bahs janjalga aylandi

Meksika Senatida AQShning ehtimoliy harbiy aralashuvi yuzasidan muhokama keskin janjal bilan yakunlandi. Bu haqda CNN agentligi ma’lum qildi.

Muxolifatdagi PRI partiyasi rahbari, senator Alejandro Moreno so‘zga chiqish imkoniyati berilmaganidan norozi bo‘lib, hukmron Morena partiyasi vakili va Senat raisi Gerardo Fernandes Noroña bilan tortishib qoldi. Tortishuv qisqa fursatda jismoniy to‘qnashuvga aylanib ketdi.

Jarayon Senatdagi jonli efirda namoyish etildi. Kadrda bir kishining Noroñaga musht ko‘tarayotgani, Moreno esa boshqa bir odamni yerga yiqitgani aks etdi. Noroña keyinchalik bu odam uning jamoasiga mansubligini aytdi.

Senator Moreno esa ijtimoiy tarmoqlarda hukmron partiyani muxolifat so‘zini to‘sishda aybladi. U birinchi jismoniy hujumni Noroña boshlaganini ta’kidlab, parlament ishida adolat buzilganini bildirdi. O‘z navbatida, Noroña muxolifatni ayblab, ularga qarshi shikoyat qilishini e’lon qildi.

Meksika siyosatida bunday zo‘ravonlik holatlari kam uchraydi, ammo tarixda qayd etilgan. Xususan, 2006-yilda prezident Felip Kalderon inauguratsiyasi arafasida ham qonunchilar o‘rtasida katta janjal kuzatilgan edi.

Eslatib o‘tamiz, avvalroq amerikalik tadbirkor Ilon Mask AQSh moliya vaziri Skott Bessent bilan prezident Donald Tramp kabinetidan chiqqanidan keyin janjal qilgani haqida xabar bergan edik.