Niagara sharsharasi O‘zbekiston va Qirg‘iziston bayroqlari ranglarida yoritiladi

31-avgust oqshomida Niagara sharsharasi O‘zbekiston va Qirg‘iziston mustaqilligining 34 yilligi munosabati bilan ushbu mamlakatlar bayroqlari ranglarida yoritiladi.

Sharshara mahalliy vaqt bilan soat 22:30 da (Toshkent vaqti bilan esa 1-sentabr soat 7:30 da) ko‘k, oq va yashil ranglarda jilolanadi. O‘zbekiston mustaqilligi sharafiga o‘tkaziladigan illuminatsiya 15 daqiqa davom etadi. Shundan so‘ng, 15 daqiqa Qirg‘iziston suvereniteti yilligi munosabati bilan ranglar qizil va oltin tuslarga almashadi.

Tadbir Monreal shahridagi qirg‘iz diasporasi va Niagara Parks ma’muriyati ko‘magida tashkil etiladi. Turistlar ushbu manzarani Kanada va AQSh chegarasining har ikki tomonidan tomosha qilishi mumkin bo‘ladi. Shuningdek, yorug‘lik shousi Earth Cam saytida jonli efirda namoyish etiladi.

31-avgust kuni sharshara ikki Markaziy Osiyo davlati bayroqlari ranglariga beshinchi bor bo‘yaladi. Bunday yoritish dastlab 2021-yilda O‘zbekiston va Qirg‘iziston mustaqilligining 30 yilligi munosabati bilan tashkil qilingandi.

Bugun, 29-avgust kuni O‘zbekiston mustaqilligining 34 yilligiga bag‘ishlangan bayram tadbiri o‘tkaziladi. Tadbirda prezident Shavkat Mirziyoyev ishtirok etadi. Shuningdek, bayram tadbiri munosabati bilan «Yangi O‘zbekiston» bog‘i bir kunga yopiladi.

30–31-avgust kunlari esa Toshkent shahrining barcha tumanlarida bayram sayllari va ommaviy konsert dasturlari tashkil etiladi.

Shuningdek, mustaqillik munosabati bilan barcha davlat teatrlari 1-sentabr kuni «Ochiq eshiklar kuni»ni o‘tkazadi. Ushbu tadbir doirasida poytaxt va viloyatlardagi teatrlarda turli spektakl va konsert dasturlari tomoshabinlarga bepul namoyish etiladi.