O‘zbekiston fuqarolariga 25-sentabrdan Iordaniyaga vizasiz rejim joriy etiladi
O‘zbekiston fuqarolari 25-sentabrdan boshlab Iordaniyada 30 kungacha vizasiz qolish huquqiga ega bo‘ladi. Bu haqda Tashqi ishlar vazirligi matbuot kotibi Ahror Burxonov Kursiv’ga ma’lum qildi.
Mazkur kelishuv 26-avgust kuni Samarqandda bo‘lib o‘tgan Shavkat Mirziyoyev va Iordaniya podshohi Abdulla II ibn al-Husayn uchrashuvi chog‘ida imzolangan.
Vazirlik xabariga ko‘ra, vizasiz rejim bitimi imzolanganidan 30 kun o‘tib, ya’ni 25-sentabrdan kuchga kiradi. Shuningdek, tomonlar turizm sohasida hamkorlik va Toshkent – Ummon yo‘nalishi bo‘yicha aviaqatnovlarni yo‘lga qo‘yish bo‘yicha kelishuvlarga ham erishgan.
Avvalroq «Kursiv» nashri O‘zbekiston va Iordaniya hamda Bahrayn o‘rtasida diplomatik pasport egalari uchun vizasiz tartib joriy etilishi bo‘yicha bitim imzolangani haqida yozgandi.
O‘zbekistonliklar qaysi davlatlarga vizasiz borishlari mumkin
1-avgust holatiga ko‘ra, O‘zbekiston fuqarolari 40 ga yaqin davlatlarga vizasiz, yana 42 ta mamlakatga esa vizani soddalashtirilgan tartibda – ya’ni kelganda viza olish (visa on arrival) yoki elektron viza (e-visa) orqali kirish imkoniga ega.
Unga ko‘ra, 2023 – 2025 yillarda Xitoy, Birlashgan Arab Amirliklari, Tailand, O‘mon, Eron kabi davlatlar bilan vizasiz rejim joriy etildi. Saudiya Arabistoni, Qatar, Vyetnam kabi mamlakatlar esa viza olish tartibini yengillashtirdi.
Qaysi davlatlarga vizasiz rejim joriy qilindi
1-iyundan e’tiboran O‘zbekiston va Xitoy o‘rtasida o‘zaro vizasiz rejim joriy qilindi.
Bitimga muvofiq, Tomonlar davlatlari fuqarolari ikki davlat hududlariga kirish, undan chiqish yoki tranzit qilish uchun har bir alohida bo‘lish muddati 30 kundan oshmaydigan muddatda va har qanday 180 kunlik davr ichida jami 90 kundan ortiq bo‘lmagan muddatda viza talablaridan ozod qilinadi.
Tomonlarning davlatlari hududiga har bir kirish va bo‘lish muddati 30 kun etib belgilandi. Agar fuqarolar 30 kundan ortiq qolishlari kerak bo‘lsa, ular kirish vizasini oldindan olishlari lozim.
Shuningdek, Bahrayn, Kuvayt va O‘monliklarga O‘zbekistonda 30 kunlik vizasiz rejim joriy qilindi.
Shu bilan birga, O‘zbekiston va Sloveniya diplomatik pasport egalari o‘rtasida vizasiz tartib joriy etiladi.
