Bugun, 29-avgust kuni Shavkat Mirziyoyev Toshkentda barpo etilayotgan Islom sivilizatsiyasi markazining yakuniy pardozlash va jihozlash jarayonlarini ko‘zdan kechirdi. Bu haqda prezident matbuot xizmati xabar berdi.
Bu loyihaga davlat rahbari tomonidan 2018-yil Ramazon hayiti kuni poydevori qo‘yilgandi. Majmua markazida balandligi 65 metrli gumbaz, to‘rt tomonida esa 34 metrlik peshtoqlar qad rostlagan.
Markazning eng asosiy qismi — Qur’oni karim zali bo‘lib, u yerda musulmon olamining muqaddas yodgorligi qadimiy Usmon Mushafi namoyish etiladi. Shuningdek, turli sulolalar davrida bitilgan Qur’on nusxalari, ularning eski o‘zbek tilidagi tarjimalari va dunyodagi eng noyob qo‘lyozma Qur’onlardan namunalar ham joylashtiriladi.
Shuningdek, markazda 460 o‘rinli zamonaviy anjumanlar zali ham barpo etilib, xalqaro uchrashuvlar va konferensiyalar o‘tkazish uchun barcha sharoitlar yaratilgan.
«O‘zbekiston buyuk tarixga ega. Ajdodlarimiz yaratgan ilmiy va madaniy meros insoniyat sivilizatsiyasida o‘chmas iz qoldirgan. Ushbu markaz bu boylikni dunyo jamoatchiligiga yetkazishda beqiyos ahamiyat kasb etadi», — dedi Shavkat Mirziyoyev.
Prezident tashrif davomida markazga tutash hududda barpo etilgan savdo va xizmat ko‘rsatish obyektlari bilan ham tanishdi.
Avvalroq «Kursiv» nashri Shavkat Mirziyoyev Shahidlar xiyoboni va «Yangi O‘zbekiston» bog‘iga tashrif buyurgani haqida yozgandi.
Islom sivilizatsiyasi markazidagi yong‘in haqida
19-avgust kuni soat 11:11 da Toshkent shahrining Olmazor tumani, Zarqaynar ko‘chasida joylashgan Islom sivilizatsiyasi markazi hududida yong‘in yuz bergandi.
Ma’lum qilinishicha, hududda qurilish mahsulotlari yonib ketgan. Voqea joyiga navbatchilikdagi va qo‘shimcha yong‘in-qutqaruv ekipajlari jalb qilinib, o‘t o‘chirish ishlari olib borilmoqda.
O‘sha kuni voqea joyiga Bosh vazir Abdulla Aripov borib, vaziyatni o‘rgangandi.
Rasmiy ma’lumotlarga ko‘ra, hodisada 19 kvadrat metr maydon zararlangan bo‘lsa-da, binoda fuqarolar jabr ko‘rmagan va ichki qismi butunligicha saqlanib qolgan.
