Rossiya va O‘zbekiston o‘rtasida elektron hujjat almashinuvi yo‘lga qo‘yildi

Rossiya va O‘zbekiston o‘rtasida yangi transchegaraviy elektron hujjat almashinuvi tizimi ishga tushirildi. Bu haqda Press Release nashri ma’lum qildi.

Loyiha Federal soliq xizmati, O‘zbekiston Respublikasi Soliq qo‘mitasi hamda ikki davlatning texnologik operatorlari — Rossiyadan «Tenzor» (Saby tizimi), «Gazinformservice» va O‘zbekistondan «Yangi texnologiyalar» markazi hamda Unicon.uz hamkorligida amalga oshirildi.

Tomonlar o‘zaro elektron imzolarni tan olish mexanizmini joriy etdi. Bu esa biznes subyektlariga hujjatlarni haftalab kutmasdan, qisqa vaqt ichida – bir necha daqiqada – raqamli shaklda imzolash va almashish imkoniyatini yaratdi.

Yangi tizim savdo-sotiq jarayonlarini tezlashtirib, yuklarni jo‘natish va moliyaviy hisob-kitoblarni osonlashtiradi. Shuningdek, operatsion samaradorlik va kapital aylanishini oshiradi.

Eslatib o‘tamiz, avvalroq Rossiyaning Xakasiya respublikasida O‘zbekiston meva-sabzavotlarini qabul qiladigan yirik transport-logistika markaz tashkil etilishi haqida xabar bergan edik.