Shavkat Mirziyoyev Shahidlar xiyoboni va «Yangi O‘zbekiston» bog‘iga tashrif buyurdi — foto
Bugun, 29-avgust kuni Shavkat Mirziyoyev Shahidlar xotirasi xiyoboni va «Yangi O‘zbekiston» bog‘idagi Mustaqillik monumentiga tashrif buyurdi. Bu haqda prezident matbuot xizmati xabar berdi.
Ikkala tadbirda Oliy Majlis palatalari, Prezident Administratsiyasi, Vazirlar Mahkamasi va Toshkent shahri jamoatchiligi vakillari, davlat va jamoat tashkilotlari vakillari, nuroniylar, ziyolilar ishtirok etdi.
Shahidlar xotirasi xiyobonida Qur’on tilovati qilinib, Vatan ozodligi yo‘lida jonini fido etgan ajdodlar xotirasi yodga olindi. Ulamolar va ziyolilar bilan suhbatda tarixni o‘rganish, uni yoshlarga yetkazish hamda mustaqillik va tinchlikning qadrini anglatish masalalari muhokama qilindi.
Davlat rahbari o‘z nutqida qatag‘on qurbonlarining fidoiyligi va jasorati hech qachon unutilmasligini ta’kidladi. So‘nggi yillarda mingdan ortiq ajdodlarimiz nomi oqlangani, «Qatag‘on qurbonlari xotirasi» muzeyi boyitilgani, yangi ilmiy tadqiqotlar olib borilayotgani hamda jamoatchilikka keng targ‘ib etilayotgani qayd etildi.
Mirziyoyev marosimdan so‘ng «Yangi O‘zbekiston» bog‘iga tashrif buyurib, Mustaqillik monumenti poyiga gulchambar qo‘ydi. Ushbu yodgorlik O‘zbekistonning qadimiy tarixi, buyuk ajdodlarning merosi va ozodlikka intilish ramzi sifatida barpo etilgani alohida ta’kidlandi.
Toshkent shahrida mustaqillik bayrami tadbirlari qayerlarda o‘tkaziladi
30–31-avgust kunlari Toshkent shahrining barcha tumanlarida bayram sayllari va ommaviy konsert dasturlari tashkil etiladi. Ushbu dasturlar bo‘lib o‘tadigan manzillar haqida shahar hokimligi ma’lumot berdi.
Unga ko‘ra, tadbirlar vaqtga qarab quyidagi manzillarda o‘tkaziladi:
- Soat 12:00 da Yunusobod tumani — «Uzekspomarkaz» maydonida;
Soat 18:00 da:
- Bektemir tumani — Coca Cola Garden bog‘i;
- Mirobod tumani — «Furqat» bog‘i;
- Sergeli tumani — Sergeli markaziy xiyoboni;
- Olmazor tumani — River park maydoni;
- Uchtepa tumani — Eco Seul bog‘i;
- Chilonzor tumani — Dream Park (G‘afur G‘ulom bog‘i);
- Shayxontohur tumani — «Navro‘z» bog‘i;
- Yangihayot tumani — «Yangi Darxon» MFY, 45–46-uylar oldidagi maydon.
Soat 19:00 da:
- Mirzo Ulug‘bek tumani — Mirzo Ulug‘bek istirohat bog‘i (Central Park);
- Yashnobod tumani — «Ashxobod» istirohat bog‘i;
- Yakkasaroy tumani — «Do‘stlik» istirohat bog‘i.
Shuningdek, bugun 29-avgust kuni «Yangi O‘zbekiston» bog‘ida mustaqillikning 34 yilligiga bag‘ishlangan asosiy tadbir o‘tkaziladi.
