Sirdaryoda 70 gektar maydonda sanoat klasteri barpo etiladi

Sirdaryo tumanida «Peng Sheng Wenren Zhigu» innovatsion klasteri qurilishining poydevor qo‘yish marosimi bo‘lib o‘tdi. Bu haqda Sirdaryo viloyati hokimi v.b. Erkinjon Turdimov ma’lum qildi.

Unga ko‘ra, tadbirda hokimiyat vakillari va «Sirdaryoda biznes qiling!» xalqaro forumi ishtirokchilari qatnashdilar.

Yangi klaster 70 gektar maydonda joylashadi. Bu yerda polietilen quvurlar va keramika sanitariya buyumlari ishlab chiqarish korxonalari, urug‘chilik agrokompleksi, shuningdek, urug‘ sifatini nazorat qilish uchun molekulyar-genetik laboratoriya faoliyat yuritadi.

Loyiha nafaqat sanoat maydonchasiga, balki xalqaro bozorga chiqish nuqtasiga ham aylanadi. Shu maqsadda hududda o‘z bojxona xizmati tashkil etiladi.

Klaster ishga tushirilishi Sirdaryo viloyatining sanoat va qishloq xo‘jaligi salohiyatini oshiradi, yangi ish o‘rinlari yaratadi hamda zamonaviy texnologiyalarni joriy etishni tezlashtiradi.

Eslatib o‘tamiz, avvalroq O‘zbekistonda Misr bilan hamkorlikda ammofos zavodi qurilishi haqida xabar bergan edik.