Tailand Konstitutsiyaviy sudi 6 – 3 ovoz bilan bosh vazir Paetongtarn Shinavatrani axloqiy me’yorlarni buzganlikda ayblab, lavozimidan chetlatdi. Bu haqda Reuters agentligi ma’lum qildi.
Sud qaroriga uning Kambodja sobiq yetakchisi Xun Sen bilan suhbatidagi milliy manfaatlarga zid bayonotlari asos bo‘ldi. Oradan ko‘p o‘tmay Tailand – Kambodja chegarasida qisqa to‘qnashuv yuz berdi.
Paetongtarn — mamlakat tarixidagi eng yosh bosh vazir — Shinavatra oilasiga mansub navbatdagi siyosatchi sifatida sud qarori bilan ketdi. U zo‘ravonlikni oldini olish maqsadida muloqot qilganini bildirdi.
Vaqtinchalik boshqaruvni o‘rinbosar Phumtham Vechayachay olib bormoqda. Parlament 3 – 5-sentabr kunlari yangi bosh vazirni saylash uchun sessiya o‘tkazadi. Asosiy da’vogar sifatida Bhumjaythai partiyasi rahbari Anutin Charnvirakul ko‘rilmoqda, ammo «Pheu Thai» ham o‘z nomzodini ilgari surishi mumkin.
Eslatib o‘tamiz, avvalroq Janubiy Koreya sobiq birinchi xonimi poraxo‘rlikda ayblangani haqida yozgan edik.
