Timur Kapadze Paulu Bentu haqida fikr bildirdi

Oʻzbekiston milliy terma jamoasi bosh murabbiyi Temur Kapadze CAFA Nations Cup doirasidagi Oʻmonga qarshi oʻyin oldidan oʻtkazilgan matbuot anjumanida oʻz fikrlarini bildirib oʻtdi.

«Biz mashgʻulotdamiz, murabbiy kelganini koʻrdik. Kelishuv haqida rasmiy xabar berilmagan. Bu terma jamoa, biz uchun eng muhimi — Oʻzbekistonning yaxshi natija koʻrsatishi. Xayrli boʻlsin. Jamoani kim boshqarishidan qat’i nazar, biz milliy terma jamoaga muxlislik qilamiz», dedi Kapadze.

Uning soʻzlariga koʻra, rahbariyat tajribali va jahon chempionatida ishlagan mutaxassisni jalb qilish niyatida.

«Oʻylaymanki, bu yaxshilikka. Biz ham doim vatanimiz termasi uchun yordamga tayyormiz. Rahbariyat qanday qaror qabul qilsa, qoʻllab-quvvatlaymiz. Terma jamoa birinchi marta JChga chiqdi, vaqt oz qoldi, musobaqaga yaxshi holatda borishimiz kerak», deya qoʻshimcha qildi murabbiy.

Kapadze oʻz faoliyati davomida berilgan vazifani bajargani, milliy jamoani tarixda birinchi marta jahon chempionatiga olib chiqqanidan mamnunligini ta’kidladi.

«34 yillik orzuni amalga oshirdik. Bu barcha uchun quvonch. Yurtboshimiz tomonidan futbolni rivojlantirish uchun sharoitlar yaratilmoqda. Kelajakda natijalarimiz yanada yaxshilanishiga ishonaman», dedi u.

Shuningdek, Kapadze futbolchilar bilan birgalikda oʻz ustidan ishlashni davom ettirishini, milliy jamoaning yuqori natijalarga erishishiga intilishini bildirdi.

Avvalroq Kursiv Uzbekistan portugaliyalik murabbiy O‘zbekiston terma jamoasini boshqarishi kutilayotgani haqida xabar bergan edi.