Yangi O‘zbekiston mustaqillik va taraqqiyotning yangi davrini boshlab berdi — prezident
29-avgust kuni «Yangi O‘zbekiston» bog‘ida davlat mustaqilligining 34 yilligi munosabati bilan tantanali bayram tadbiri bo‘lib o‘tdi. Tadbirda Shavkat Mirziyoyev nutq so‘zlab, xalqimiz va xorijdagi vatandoshlarimizni mustaqillik bayrami bilan muborakbod etdi, deya xabar bermoqda prezident matbuot xizmati.
«Yangi O‘zbekiston g‘oyasi asosida boshlangan islohotlarimiz tufayli har bir yurtdoshimiz mustaqillik berilgan huquq va erkinliklarni hayotida chuqur his qilmoqda. Biz uch ming yillik boy tarix va madaniyatimizni qayta idrok etib, Birinchi va Ikkinchi Renessans an’analari asosida Uchinchi Rennessans sari dadil qadamlar qo‘ymoqdamiz, — deya ta’kidladi Mirziyoyev.
Davlat rahbari iqtisodiy o‘sish va demografik ko‘rsatkichlarga e’tibor qaratib, so‘zlarini davom ettirdi:
“Dunyodagi murakkab vaziyatga qaramay, iqtisodiyotimiz barqaror o‘smoqda. Aholimiz yiliga o‘rtacha 700–800 mingga ko‘paymoqda, har yili 500–600 ming yosh mehnat bozoriga kirib kelmoqda. Shu sababli ta’lim, kasb-hunar va ish bilan ta’minlash uchun mustahkam tizim, kafolatli investitsiya va infratuzilma zarur.»
Shuningdek, prezident Yangi O‘zbekistonda tadbirkorlikning iqtisodiy o‘sishdagi muhim rolini qayd etdi:
- So‘nggi sakkiz yilda yalpi ichki mahsulot ikki baravar oshib, o’tgan yilgi ko‘rsatkich $115 mlrdga yetgan, yil yakuni bilan $130 mlrd bo‘ladi.
- Eksport hajmi $26 mlrd, oltin-valyuta zaxiralari esa birinchi marta $48 mlrddan oshdi.
- Shu davrda xorijiy investitsiyalar $130 mlrdni tashkil etdi.
Prezident, shuningdek, investitsiyalar va yangi ish o‘rinlari haqida ham so‘zlab, joriy yilning o‘zida $35 mlrd investitsiya evaziga 9 mingga yaqin yangi korxona va xizmat ko‘rsatish majmuasi barpo etilishini qayd etdi. Shu bilan birga, yil boshidan beri 5,5 mln aholining bandligini ta’minlash rejalari amalga oshirilmoqda, sakkiz oy ichida esa 5 mlnlik rejaga erishildi.
Turizm sohasidagi yutuqlar ham e’tibordan chetda qolmadi:
«O‘zbekiston dunyoga keng ochilganidan so‘ng, xorijiy sayyohlar soni 10 mlndan oshdi, turizm xizmatlari eksporti esa $3 mlrddan yuqori bo‘ldi. Tariximiz va milliy o‘zligimizni tiklashga qaratilgan katta majmualar — Islom sivilizatsiyasi markazi, Imom Buxoriy ziyoratgohi — yakunlanmoqda.»
Eslatib o’tamiz, avvalroq Shavkat Mirziyoyev Toshkentda barpo etilayotgan Islom sivilizatsiyasi markazining yakuniy pardozlash va jihozlash jarayonlarini ko‘zdan kechirgan edi.
