Qozog‘istonning «Yevroosiyo Banki» O‘zbekistondagi faoliyatini yakunlagani haqida xabar berilgandi. Bu haqda bank matbuot xizmati ham ma’lum qildi.
Xabarga ko‘ra, bu qaror bankning avvalroq qabul qilingan strategiyasi, ya’ni resurslarni Qozog‘istonda biznesni rivojlantirishga yo‘naltirish rejasining mantiqiy davomi hisoblanadi.
Ma’lum qilinishicha, O‘zbekiston bankiga investitsiyalarni to‘xtatish to‘g‘risidagi qaror regulyator tomonidan rasmiy bildirishnoma yuborilishidan ancha oldin bank boshqaruvi va direktorlar kengashi tomonidan ma’qullangan.
«Qozog‘iston bozoriga e’tibor qaratish bizga yangi loyihalarni amalga oshirish, shuningdek, mijozlar va hamkorlar uchun eng katta salohiyat mavjud bo‘lgan yo‘nalishlarda o‘z pozitsiyalarimizni yanada kuchaytirish imkonini beradi», — deyiladi bank bayonotida.
Markaziy bank izohi
Markaziy bank ushbu qarorga sabab sifati bank tomonidan ustav kapitali miqdorining qonunchilikda belgilangan eng kam talabga muvofiqlashtirilmaganligini ko‘rsatgan. Shuningdek, «Banklar va bank faoliyati to‘g‘risida»gi qonunchilikda belgilangan boshqa majburiyatlarning bajarilmaganligi qayd etilgandi.
Ma’lumot uchun, 2023-yilning aprel oyida prezident banklar ustav kapitalining eng kam miqdorini bosqichma-bosqich oshirish to‘g‘risidagi qonunni imzoladi. O‘sha yilning sentabridan bu 200 mlrd so‘mni, 2025-yildan esa 500 mlrd so‘mni tashkil etmoqda.
