Geely’ning premium brendi Zeekr Chendu avtosaloni arafasida yangi Zeekr 9X modelining tasvirlarini taqdim qildi. Uning narxi taxminan $80 ming bo‘lishi kutilmoqda.
Mashina saloni hashamatli darajada jihozlangan. Ikkinchi qatorda nol tortishish (zero-gravity) o‘rindiqlari bor. Ular isitish, ventilyatsiya, massaj va oyoq tayanchi funksiyalarini taklif qiladi. O‘rindiqlar 180 daraja aylantirilishi mumkin, orqa yo‘lovchilar uchun katta ekran ham o‘rnatilgan.
Infotainment tizimi Qualcomm Snapdragon 8295 chipida ishlaydi. Markaziy panelda yog‘och tayanch, simsiz quvvatlash joyi va kristalli boshqaruv tugmalari mavjud. Avtomobilga ilk bor Xitoy mashinasida qo‘llanayotgan Naim audio tizimi o‘rnatilgan. U 32 karnay, 8 ta «seat shaker» va 40 ta mustaqil sozlash kanali bilan 3868 Vt quvvatda ishlaydi.
Texnik tomondan Zeekr 9X CATL ishlab chiqargan Freevoy batareyasi bilan ajralib turadi. Ikki variant mavjud: 55,1 kVt·soat va 70 kVt·soat. 70 kVt·soatli akkumulyator — yo‘lovchi gibrid mashinalar orasida eng kattasi bo‘lib, 302 km toza elektr yurish masofasini ta’minlaydi. 900V tizim va 6C tezkor quvvatlash texnologiyasi yordamida 20 foizdan 80 foizgacha atigi 9 daqiqada quvvatlash mumkin.
Eslatib o‘tamiz, Kursiv Uzbekistan nashri Volkswagen Lamando L 2025 avtomobili taqdim etilgani haqida yozgan edi.
