Google Pixel 10 smartfonlarida 3 GB operativ xotira faqat sun’iy intellekt funksiyalari uchun ajratiladi. Bu haqda WCCF Tech nashri ma’lum qildi.
Smartfon 12 yoki 16 GB RAM bilan jihozlanadi. Biroq yangi tizim tufayli xotiraning 3 GB qismi faqat SI funksiyalari uchun bloklanadi. Demak, operatsion tizim va odatiy ilovalar ushbu hajmdan foydalana olmaydi. Bu esa shuni anglatadiki, masalan, 12 GB RAMli bazaviy modelda foydalanuvchi ixtiyorida aslida faqat 9 GB xotira qoladi.
Nima uchun bunday qilingan
Google buni SI funksiyalarining tezroq va barqaror ishlashi uchun amalga oshirmoqda. Ajratilgan resurs tufayli SI xizmatlari boshqa ilovalar bilan xotirani bo‘lishishga majbur bo‘lmaydi. Shu sababli sun’iy intellekt imkoniyatlari tezroq javob berishi va ko‘proq vazifalarni bir vaqtda bajarishi kutilmoqda.
Shubhalar va savollar
Bu qaror foydalanuvchilarda savol uyg‘otmoqda. Chunki oddiy ilovalar va tizim uchun kamroq xotira qolishi, ayniqsa bazaviy modelda, unumdorlikka ta’sir qilishi mumkin. SI xizmatlari qanchalik tez ishlashini esa hali amaliy testlar ko‘rsatib beradi.
Avvalroq Kursiv Uzbekistan Google Pixel 10 uch kamerali tizim bilan taqdim etilishi haqida xabar bergan edi.
Google rasmiy ravishda yangi Google Pixel 10 smartfonini namoyish etdi. Bu haqda kompaniya saytida ma’lum qildi.
Asosiy yangilik sifatida bazaviy model endi ilk bor uchlik kamera tizimiga ega bo‘lgani qaralmoqda. Asosiy modul 48 MP, ultra-keng modul 13 MP, telekamera esa 10,8 MP bo‘lib, 5x optik zoomni qo‘llab-quvvatlaydi. Old kamera 10,5 MP sensorga ega va avtofokus bilan jihozlangan.
