O‘zbekiston prezidenti Shavkat Mirziyoyev 30-avgust kuni Xitoy Xalq Respublikasi raisi Si Szinpin taklifiga binoan rasmiy tashrif bilan Xitoyga jo‘nab ketdi. Bu haqda Prezident matbuot xizmati xabar bermoqda.
Tashrif doirasida davlat rahbari 31-avgust – 1-sentabr kunlari Tyantszin shahrida o‘tadigan Shanxay hamkorlik tashkiloti Davlat rahbarlari kengashi majlisi va «ShHT plus» formatidagi uchrashuvda qatnashadi. Unda tashkilot faoliyatini takomillashtirish, ko‘p qirrali hamkorlikni rivojlantirish masalalari muhokama qilinadi. Shuningdek, Tyantszin deklaratsiyasi va boshqa qator qo‘shma hujjatlar qabul qilinishi rejalashtirilgan.
2-sentabr kuni Pekinda prezident Mirziyoyev Si Szinpin bilan muzokaralar o‘tkazadi. Shuningdek, xorijiy delegatsiyalar rahbarlari hamda Xitoy ishbilarmon doiralari vakillari bilan uchrashuvlari bo‘lib o‘tadi.
3-sentabr kuni esa O‘zbekiston rahbari Ikkinchi jahon urushida g‘alabaning 80 yilligiga bag‘ishlangan tantanali tadbirlarda ishtirok etishi ko‘zda tutilgan.
Eslatib o‘tamiz, Shavkat Mirziyoyev Lukashenko bilan telefonda muloqot qilgani haqida yozgan edik.
