2021-yildan beri Yandex Go haydovchilari va kuryerlari UzAlert bilan hamkorlikda yo‘qolganlarni izlash ishlariga jalb etilmoqda. Kompaniya matbuot xizmati ma’lumotiga ko‘ra, bugungi kunda 27 mingdan ortiq taksi haydovchisi va 2 ming kuryer ushbu tashabbusda ishtirok etmoqda.
Har hafta ularga yo‘qolgan insonlar haqida ma’lumotlar yuboriladi. Haydovchi va kuryerlarning harakatchanligi tufayli ular zarur paytda muhim ma’lumot berishi, yo‘qolgan odamni ko‘rib qolsa, UzAlert koordinatorlariga xabar qilishi mumkin.
Loyihada istalgan haydovchi yoki kuryer ishtirok etishi mumkin. Ular xizmatga ulanganidan ikki hafta o‘tgach, rozilik bildirgan holda Yandex Pro ilovasida alohida chatga qo‘shiladi va shu orqali yo‘qolganlar bo‘yicha ma’lumotlar qabul qilinadi. Hozircha tashabbus O‘zbekistonning 18 shahrida amal qilmoqda.
Eslatib o‘tamiz, Kursiv Uzbekistan nashri o‘quv yilining ilk kunida Yandex Go’dan qaysi paytda taksi chaqirish kerakligi haqida yozgan edi.
