Geely kompaniyasi Chendu avtosalonida yangilangan Geely Preface avtomobilini namoyish qildi. Model mahalliy bozorda Xingrui Dongfang Yao nomi bilan sotiladi.
Yangi Preface tashqi ko‘rinishda yangilangan radiator panjarasi, torroq faralar va qayta ishlangan bamper bilan ajralib turadi. Model uch xil rangda, jumladan yashil va ko‘k variantlarda taqdim etilgan.
Avtomobil elektronikasida ham jiddiy yangiliklar bor. U yangi GEEA3.0 arxitekturasiga yangilanishlarni qo‘llab-quvvatlaydi. Infotainment tizimi esa Flyme Auto asosida ishlab, DeepSeek bazasidagi sun’iy intellekt funksiyalari bilan boyitilgan. Shuningdek, mashina Qianli Haohan H3 avtopilot tizimi bilan jihozlangan bo‘lib, 11 ta yuqori aniqlikdagi kamera, 3 ta millimetr diapazonli radar va 12 ta ultratovushli datchikdan foydalanadi.
Texnik jihatdan Preface yangilangan Monjaro modeli bilan bir xil. Kapot ostida 2,0 litrli, 272 ot kuchiga ega dvigatel joylashgan. U Aisin 8 pog‘onali avtomat uzatmalar qutisi bilan ishlaydi. Mashina 100 km/soat tezlikka atigi 6,5 soniyada chiqadi.
Eslatib o‘tamiz, Kursiv Uzbekistan nashri Jetour Zongheng G700 avtomobili taqdim etilgani haqida yozgan edi.
