iTel Super 26 Ultra smartfoni taqdim etildi

iTel kompaniyasi yangi Super 26 Ultra smartfonini rasmiy ravishda taqdim etdi. Qurilma sentyabr o‘rtalaridan boshlab sotuvga chiqarilishi rejalashtirilgan, deya xabar bermoqda Gizmochina.

Yangi model 6-nanometrlik Unisoc T7300 protsessori asosida ishlaydi hamda IceCool Tech nomli 10 qatlamli sovitish tizimi bilan jihozlangan. Smartfon 6,78 dyuymli egri 3D AMOLED displeyga ega bo‘lib, u 1,5K aniqlik va 144 Gts yangilanish tezligini ta’minlaydi. Ekran Corning Gorilla Glass 7i himoya oynasi bilan mustahkamlangan. Ishlab chiqaruvchi qurilmaning kamida olti yil davomida barqaror ishlashini kafolatlamoqda.

Super 26 Ultra 6000 mA·soat sig‘imli akkumulyator bilan ta’minlangan bo‘lib, korpus qalinligi atigi 6,8 millimetrni tashkil etadi. Smartfon IP65 darajasida namlik va changdan himoyalangan. Shuningdek, AI Rainproof Touch funksiyasi orqali qurilmadan yomg‘ir ostida ham foydalanish mumkin.

Model kumush, ko‘k, oltin va kulrang ranglarda taqdim etiladi. Narxlar 128 GB xotirali versiyaga $148, 256 GB xotirali versiyaga esa $168 etib belgilangan.

Eslatib o‘tamiz, avvalroq 215 dollarlik Samsung Galaxy A17 5G taqdim etilgan edi.