Telegram’da profilga musiqa qo‘yish funksiyasi ishga tushdi

Telegram messenjerida foydalanuvchi statusiga musiqa qo‘shish imkoniyati paydo bo‘ldi. Shuningdek, foydalanuvchilar asosiy profil oynasini tanlash, kolleksion sovg‘alarga asoslangan chat mavzularidan foydalanish va hattoki do‘stlarning sovg‘alarini yaxshilash imkoniyatiga ega bo‘lishadi.

Profilga musiqa qo‘shish

Endi chatlarda eshitgan qo‘shiqlarni bir tugma orqali profilga joylash mumkin. Ular profil rasmining ostida maxsus panelda ko‘rinadi va avtomatik tarzda shaxsiy pleylistni shakllantiradi.

Android uchun yangi profil dizayni

Konkurs asosida ishlab chiqilgan yangilangan interfeys endi Android foydalanuvchilariga ham taqdim etildi. Unda iOS dagi kabi yumshoq skroll animatsiyalari mavjud.

Asosiy profil oynasini tanlash

Foydalanuvchi profiliga kirilganda birinchi ko‘rinadigan bo‘limni o‘zingiz belgilashingiz mumkin. Masalan, saqlangan hikoyalarni yoki sovg‘a kolleksiyalarini oldinga chiqarish imkoni mavjud.

Sovg‘alarga asoslangan chat mavzulari

2021-yildan buyon mavjud bo‘lgan chat mavzulari endi Telegram sovg‘alari asosida ham yaratilmoqda. Masalan, Plush Pepe, Precious Peach, Durov’s Caps yoki Heart Locket sovg‘alariga ega bo‘lganlar o‘ziga xos chat oboylarini ishlatishi mumkin.

Sovg‘alarni yaxshilash imkoniyati

Endi foydalanuvchilar do‘stlarining sovg‘alarini yaxshilashda yordam bera olishadi. Buning uchun yulduzchalar yuborish kifoya. Yangi filtr va animatsiyalar jarayonni yanada qiziqarli qilmoqda.

Sovg‘alar qiymati va statistika

Telegram’da sovg‘alar savdo maydonchasida sotilishi mumkin. Endilikda har bir sovg‘ada «Qiymat» maydoni paydo bo‘lib, uning taxminiy qayta sotish narxini ko‘rsatadi. Shuningdek, o‘xshash sovg‘alarning o‘rtacha narxi haqida batafsil statistika ham mavjud.

Stikerlar uchun yangi mini-ilova

@Stickers botidan tashqari endi Telegram’da yangi mini-ilova yordamida stiker va emodjilarni yaratish, ular bo‘yicha batafsil statistikani ko‘rish va boshqarish imkoniyati mavjud.

Avvalroq Kursiv Uzbekistan ushbu funksiya paydo bo‘lishi haqida yozgandi.