Afg‘onistonning sharqida yuz bergan kuchli zilzila oqibatida 1124 kishi halok bo‘ldi, 3251 kishi jarohat oldi. 8000 dan ortiq uy vayron bo‘ldi. Bu haqda CNN ma’lum qildi.
Qurbonlar va vayronagarchiliklar
CNN va Afg‘oniston Qizil Yarim Oy Jamiyati ma’lumotlariga ko‘ra, zilzila oqibatida 1124 kishi halok bo‘ldi, 3251 kishi turli jarohatlar oldi. Vayron bo‘lgan uylar soni 8000 dan ortiq. Eng ko‘p zarar ko‘rgan hudud Kunar viloyati bo‘lib, kamida uchta qishloq butunlay vayronaga aylangan.
Xalqaro yordam
Afg‘onistonning hokimiyatdagi Tolibon harakati xalqaro yordam so‘radi. Bunga javoban:
BMT o‘zining CERF fondidan $5 mln ajratdi. Buyuk Britaniya 1 mln funt sterling yordam ajratishini bildirdi. Xitoy, Hindiston va Shveysariya ham yordam ko‘rsatishga va’da berdi.
Zilzilaning tafsilotlari
Zilzila 31-avgust kuni mahalliy vaqt bilan yarim tundan keyin Nandahar viloyatining Jalolobod shahridan 27 km shimoli-sharqda yuz berdi. Magnituda — 6,0, o‘chog‘i 8 km chuqurlikda joylashgan. Zarar Laghman, Nuriston va Panjshir viloyatlarida ham qayd etilgan.
Qutqaruv ishlari
Eng ko‘p zarar ko‘rgan tog‘li hududlarda qutqaruv ishlari qiyin kechmoqda. Kuchli yomg‘ir, ko‘chkilarning yuz berishi va yo‘llarning buzilishi qutqaruvchilarning ishini sezilarli darajada qiyinlashtirgan.
Avvalroq Kursiv Uzbekistan prezident Afg‘onistonda sodir bo‘lgan zilzila munosabati bilan hamdardlik bildirgani haqida xabar bergan edi.
