Chevrolet Cobalt O‘zbekistonda eng ommabop oilaviy sedanlardan biri sanaladi. Ko‘plab haydovchilar uni taksi sifatida tanlab kelmoqda. Bu model mamlakatda keng tarqalgan va ayniqsa yo‘lovchi tashishda katta ulushga ega. Cobalt’ning mashhurligi yildan-yilga oshmoqda. Ushbu maqolada Chevrolet Cobalt yordamida taksichilik qilish va foydalanishda nimalarga ahamiyat berish kerakligi haqida so‘z boradi.
Ushbu maqola orqali quyidagilarni bilib olasiz:
- Modelning texnik xususiyatlari va yonilg‘i sarfi;
- Toshkent shahrida qancha pul topish mumkin;
- Shaharlarda Cobalt yordamida taksichilik qilish;
- Viloyatlararo taksichilik;
- Taksichilik qilish oldidan nimalarga e’tibor berish lozim.
Texnik xususiyatlari va yonilg‘i sarfi
Chevrolet Cobalt taksi uchun texnik jihatdan qulay modeldir. 1,5 litrli, 4 silindrli benzin dvigateli 105 ot kuchi beradi. Bu quvvat shahar ichida yo‘lovchi tashishga bemalol yetadi. Kerak bo‘lsa, qo‘shimcha tezlanish ham ta’minlay oladi.
Transmissiya 5 pog‘onali mexanik yoki 6 pog‘onali avtomat. Haydovchi tejamkorlik yoki qulaylikka qarab tanlov qiladi. Modelning sarfi 100 km uchun o‘rtacha 6,2 litr deb ko‘rsatilgan. Real sharoitda odatda 6–7 litr atrofida sarf qayd etiladi. Tirbandlik va konditsioner sarfni biroz oshirishi mumkin.
Ko‘pchilik Cobalt’ni metan gazi bilan yuritadi. Bir kunlik CNG 80–100 ming so‘mga tushadi. Bu 220–250 km uchun yetarli hisoblanadi. Bu taxminan 1 km uchun 300–400 so‘m xarajat demakdir. Gaz benzinga qaraganda ancha arzon, sof foyda oshadi.
Konditsioner zavoddan o‘rnatilgan va samarali ishlaydi. Issiqda salqin, qishda iliq salon mijozni ko‘proq jalb etadi. Bu buyurtmalar soni va kunlik tushumni oshirishga yordam beradi. Salon keng, besh kishi bemalol o‘tiradi, yurish qulay. Bagaj 563 litr, katta chamadonlar ham sig‘adi. Aeroport reyslari va oilaviy safarlar uchun qulaydir.
Xavfsizlik tizimida havo yostiqchalari va ABS mavjud. Kuzov va osma mustahkam, notekis yo‘llarga moslashgan. Oddiy tuzilish tufayli servis ishlari tez va arzon. Ehtiyot qismlar mahalliy bozorda oson topiladi.
Haydovchilarning daromad va tajribalari
Chevrolet Cobalt’da taksi qilishdan olinadigan daromad ko‘plab omillarga bog‘liq. Shahar kattaligi, qatnov masofasi, ob-havo, tarif turi va xarajatlar muhim rol o‘ynaydi. Shuningdek, mashinaning texnik holati va tashqi ko‘rinishi ham mijoz tanloviga ta’sir qiladi.
Toshkent shahrida
Poytaxtda talab yuqori, ayniqsa yozda va qishda konditsionerli mashinalar ko‘proq chaqiriladi. Haydovchi Sherali Nodirov so‘zlariga ko‘ra, mavsumiy issiq va sovuq paytlarda Cobalt bilan kuniga 500–600 ming so‘m tushum qilish mumkin. Oddiy kunlarda esa barcha xarajatlar chegirilgach, kamida 300 ming so‘m sof foyda qoladi. U ertalab va kechqurun, ishga yoki o‘qishga shoshilayotgan paytda buyurtmalar ko‘pligini aytadi.
Yana bir haydovchi Sardor Do‘stmurodov kuniga o‘rtacha 450 ming so‘m ishlab topishini ta’kidlaydi. Uning hisobiga ko‘ra, xarajatlar va Yandex Go komissiyasi chegirilgach, 300 ming so‘mgacha sof foyda qoladi.
«Mashina yangi bo‘lsa, oynalari qoraytirilgan bo‘lsa, mijozlar buni qadrlashadi va daromad oshadi,» — deydi u.
Sardorning aytishicha, shinam va salqin salonli Cobalt’ga mijozlar ko‘proq baho beradi. Bundan tashqari, Yandex Go haydovchilariga qo‘shimcha bonuslar ham beriladi. Masalan, bir haftada 100 ta buyurtma bajarilganda, taxminan 500 ming so‘m mukofot qo‘shilishi mumkin. Bu haydovchilar daromadiga ijobiy ta’sir qiladi.
Boshqa shaharlar misoli (Samarqand)
Viloyat markazlarida ham Yandex Go va boshqa taksi ilovalari faol ishlayapti. Biroq bu joylarda daromad darajasi poytaxtga qaraganda pastroq. Masalan, Samarqandda Yandex Go haydovchisi bo‘lib ishlayotgan To‘lqin Ergashov kuniga o‘rtacha 200 ming so‘m daromad qilishini aytadi.
Uning so‘zlariga ko‘ra, Samarqand kichikroq shahar bo‘lgani uchun odamlarning aksariyati hanuz ko‘chadan taksi ushlashadi. Shuning uchun buyurtmalar soni kamroq.
Shuningdek, tariflar ham Toshkentga qaraganda arzonroq. Masalan, 3–4 kilometr yo‘l uchun yo‘lovchilar atigi 10–15 ming so‘m to‘lashadi.
Natijada, kunlik tushum katta shaharlardagi kabi yuqori bo‘lmaydi. Shu sababli haydovchilar mijoz ko‘p joylarga borishga harakat qilishadi.
Ko‘pincha turistlar boradigan maskanlar yoki temiryo‘l vokzallari yaqinida ko‘proq buyurtma olish mumkin. Ba’zilar esa shaharlararo qatnovlar orqali qo‘shimcha daromad qidirishadi.
Shaharlararo yo‘nalishlar (Toshkent – Samarqand)
Chevrolet Cobalt faqat shahar ichida emas, balki shaharlararo qatnovlarda ham ishlatilmoqda. Masalan, haydovchi Abbos Shermatov har kuni Toshkent va Samarqand oralig‘ida yo‘lovchi tashib daromad qilmoqda.
Uning hisobiga ko‘ra, bu masofali qatnovlarda kuniga 700 ming so‘mgacha sof foyda olish mumkin. Ba’zan qo‘shimcha ravishda pochta yoki kichik yuklarni ham tashib, daromadni oshiradi.
Biroq u uzoq masofali qatnovlarning kamchiliklarini ham ta’kidlaydi. Avvalo, mashina tezroq eskiradi va ehtiyot qismlar tez yeyiladi.
Yana bir muammo — tezlikni biroz oshirish oqibatida radar jarimalari. Abbosning so‘zlariga ko‘ra, oy davomida taxminan o‘n martalab jarima to‘lashga to‘g‘ri keladi.
Shuningdek, tinimsiz uzoq yo‘l haydovchining sog‘lig‘iga ham salbiy ta’sir qiladi. Doimiy charchoq yig‘ilib qolishi mumkin.
Shu sababli Abbos haftasiga 3-4 marta qatnov qilishni ma’qul ko‘radi.
Taksichilik qilishda nimalarga e’tibor berish lozim
Yuqoridagi kuzatuvlardan ko‘rinib turibdiki, Chevrolet Cobalt bilan taksi qilish O‘zbekistonda foydali. Daromad hajmi haydovchining joylashuvi va mehnatiga qarab o‘zgaradi. Cobalt oddiy tuzilgan bo‘lsa-da, unga doimiy texnik xizmat ko‘rsatish shart. Moyni va filtrlarni vaqtida almashtirish mashinani soz ushlab turadi va to‘satdan chiqadigan xarajatlarning oldini oladi. Metan gazida ishlash haydovchiga katta tejash imkonini beradi.
Kunlik 70–80 ming so‘mlik CNG 220–250 kilometr uchun yetarli bo‘ladi va bu benzinga qaraganda ancha arzon. Mijozlar uchun konditsioner, toza va shinam salon katta ahamiyatga ega. Shu bois haydovchi mashinasini ozoda saqlasa va ruxsat doirasida oynalarni qoraytirsa, bu mijozlarni ko‘proq jalb qiladi.
Haydovchilik intizomiga rioya qilish ham muhim. Uzoq vaqt tinimsiz rulda o‘tirish sog‘liq uchun zararli va xavfsizlikka tahdid soladi. Tezlik qoidalariga amal qilish jarimalardan saqlaydi va sof foydani oshiradi. Bozorga moslashish ham daromadni belgilaydi. Katta shaharlarda ertalab va kechki gavjum paytlarda faol bo‘lish foyda keltiradi, kichik shaharlarda esa ko‘cha mijozlarini ham qabul qilish yoki agregatorning bonus tizimidan foydalanish muhimdir. Shu jihatlarning barchasi Cobalt’ni taksichilar uchun ishonchli va foydali ish quroliga aylantiradi.
Eslatib o‘tamiz, Kursiv Uzbekistan nashri yaqin kunlarda yangilangan Chevrolet Cobalt taqdim etilishi haqida yozgan edi.
