Smartfon bozorida Samsung kompaniyasining ham o‘rni alohida. 2025-yilning birinchi choragida Samsung 60,5 mln dona smartfon yetkazib bergan. Bu kompaniyaga global bozorda 20% ulushni ta’minladi. Kursiv Uzbekistan nashrining ushbu maqolasida eng yaxshi batareyaga ega Samsung smartfonlari haqida so‘z boradi.
Ushbu maqoladan quyidagi modellarning batareyasi haqida bilib olasiz:
- Samsung Galaxy M54 5G
- Samsung Galaxy F15 5G
- Samsung Galaxy M34 5G
- Samsung Galaxy S25 Plus
- Samsung Galaxy S24 Plus
Samsung Galaxy M54 5G
Galaxy M54 5G 2023-yil mart oyida taqdim etilgan va qisqa vaqt ichida bozorda o‘z o‘rnini topgan model hisoblanadi. Smartfonning asosiy ustunligi 6000 mA/soat sig‘imli katta batareyasidir. Bu quvvat foydalanuvchiga kun davomida va undan ham ko‘proq vaqt telefonni quvvatlashsiz ishlatish imkonini beradi.
Qurilma Exynos 1380 protsessori bilan jihozlangan bo‘lib, 6,7 dyuymli Super AMOLED+ displeyi 120 Hz yangilanish tezligiga ega. Ekran yuqori tiniqlik va silliqlikni ta’minlaydi. Asosiy kamera 108 megapikselli bo‘lib, OIS (optik stabilizatsiya) texnologiyasi bilan qo‘llab-quvvatlangan. Bu esa surat va videolarni yanada tiniq olish imkonini beradi. Ushbu model o‘yin zavqi va boy foydalanish qulayligini taqdim etishi mumkin.
Samsung Galaxy F15 5G
Galaxy F15 5G 2024-yil mart oyida taqdim etilgan. Model katta 6000 mA/soat sig‘imli akkumulyator bilan jihozlangan bo‘lib, foydalanuvchiga uzoq muddat davomida quvvatlashsiz ishlash imkonini beradi.
Smartfon MediaTek Dimensity 6100+ protsessori bilan ishlaydi. Displeyi 6,6 dyuymli Super AMOLED bo‘lib, ranglarni yorqin va tiniq aks ettiradi. Asosiy kamera 50 megapikselli moduldan tashkil topgan bo‘lib, kundalik surat va videolarni sifatli olish uchun mo‘ljallangan.
Galaxy F15 5G o‘rta narx toifasidagi samarali yechim sifatida bozorda o‘z o‘rnini topmoqda va uzoq ishlash imkoniyatini qadrlaydigan foydalanuvchilar uchun qulay tanlov bo‘lib turibdi. Modelning batareyasi kunlik foydalanish uchun yetarli deb baholanmoqda.
Samsung Galaxy M34 5G
Galaxy M34 5G 2023-yil iyul oyida taqdim etilgan bo‘lib, katta 6000 mA/soat sig‘imli batareyaga ega. Qurilma bir marta quvvatlaganda ikki kungacha ishlay oladi. Real foydalanishda taxminan 9-10 soat ekran vaqti taqdim etsa, videoni uzluksiz 17 soat davomida ijro eta olishi aniqlangan.
Smartfon Exynos 1280 (5 nm) protsessorida ishlaydi. 6,5 dyuymli Super AMOLED displey 120 Hz yangilanish tezligiga ega bo‘lib, ranglar sifati va silliq animatsiyalarni ta’minlaydi. Asosiy 50 megapikselli kamera OIS texnologiyasi bilan jihozlangan va surat hamda videolarda tiniqlikni oshiradi.
Galaxy M34 5G uzoq ishlashni qadrlaydigan foydalanuvchilar uchun mo‘ljallangan hamyonbop model sifatida ajralib turadi.
Samsung Galaxy S25 Plus
Galaxy S25 Plus 2025-yilda taqdim etilgan eng ilg‘or flagmanlardan biri sifatida e’tirof etilmoqda. Qurilmaning batareya sig‘imi 5000 mA/soat bo‘lsa-da, aniq raqam ishlab chiqaruvchi tomonidan hali rasman e’lon qilinmagan.
Avtonom ishlash borasida Galaxy S25 Plus yuqori natija ko‘rsatmoqda: Tom’s Guide sinovlariga ko‘ra, telefon 18 soatgacha ishlagan. Bu natija avvalgi S24 Plus modelidan bir soatga ko‘proq va hatto S24 Ultra’dan ham ustun. Shu jihati bilan S25 Plus uzoq ishlashni istagan foydalanuvchilar uchun qulay flagman sifatida ajralib turadi.
Texnik jihatdan qurilma Snapdragon 8 Elite chipida ishlaydi, 120 Hz AMOLED displey bilan jihozlangan. Kamera tizimi yuqori darajada bo‘lib, foto va video imkoniyatlari sezilarli yaxshilangan. Shuningdek, 45 vatt tezkor zaryadlash funksiyasi ham qo‘llab-quvvatlanadi.
Samsung Galaxy S24 Plus
Galaxy S24 Plus 2024-yilda taqdim etilgan va flagman toifasidagi smartfonlar orasida o‘z o‘rniga ega. Model 4900 mA⋅soat sig‘imli batareyaga ega. Sinovlarga ko‘ra, u 31 soat davomida video tomosha qilish yoki 92 soat audio tinglash imkoniyatini beradi.
Real hayotdagi aktiv foydalanishda esa taxminan 16 soatgacha ishlashi qayd etilgan.
Qurilma Snapdragon 8 Gen 2 protsessorida ishlaydi va 120 Hz AMOLED displey bilan jihozlangan. Sun’iy intellektga asoslangan kuchli funksiyalar esa kamera va ishlash samaradorligini oshiradi.
Eslatib o‘tamiz, Kursiv Uzbekistan nashri eng yaxshi 5G smartfonlari haqida yozgan edi.
