Mendan qat’iy ravishda OIVga test topshirishimni so‘rashmoqda — sobiq elchi
Yevropada uzoq muddat O‘zbekiston elchisi bo‘lib ishlagan, 68 yoshli Alisher Fayzullayevdan mamlakatga qaytgach, OIV va sifilis tahlillarini topshirish talab qilingan. Bu haqda o‘zining Facebook sahifasida ma’lum qildi.
«So‘nggi kunlarda tuman poliklinikasidan hamshira bizga murojaat qilib, joriy yilda chet elda uch oydan ortiq vaqt bo‘lganim bois OIV va sifilis bo‘yicha tahlil topshirishimni qat’iy so‘ramoqda», — deya holatni izohladi Fayzullayev.
Avgust oxirida «Gazeta.uz» xorijdan qaytib kelayotgan o‘zbekistonliklar tekshiruvdan o‘tkazilayotgani haqida xabar bergan edi. Nashr yozishicha, mexanizm hali kuchga kirmagan, biroq shifokorlar allaqachon tahlil talab qila boshlashgan. Shuningdek, voyaga yetmaganlardan ham OIV bo‘yicha tekshiruv o‘tkazilgani haqida xabarlar bo‘lgan.
Alisher Fayzullayev tibbiyot muassasasi harakatlari Senat ma’qullagan qonun loyihasi bilan bog‘liq bo‘lishi mumkinligini taxmin qildi. Unga ko‘ra, chet elda 90 kundan ortiq bo‘lib qaytgan fuqarolar tahlil topshirishi kerak.
Fayzullayev hamshiraga bir necha bor ushbu hujjat faqat 18 yoshdan 60 yoshgacha bo‘lgan o‘zbekistonliklarga tatbiq etilishini tushuntirgan. Biroq hamshira klinika rahbariyati bu haqida bexabar ekanini, tekshiruv esa hammani qamrab olayotganini aytgan.
Avvalroq «Kursiv» nashri ham iyun oyida chet eldan O‘zbekistonga kelayotganlar OIV bo‘yicha majburiy tekshiruvdan o‘tishi mumkinligi haqida yozgandi.
