Masofadan turib bank kartalarini yopishda muammo ko‘rmayapman — Timur Ishmetov
Barcha banklarda masofadan turib bank kartasini ochishda hech qanday muammo yo‘q. Ularni yopishda esa faqatgina bank yoki uning filialiga borib ariza asosida yopish mumkin. Markaziy bank rahbari Timur Ishmetov bu tizimdagi o‘zgarishlar haqida jurnalistlar bilan bo‘lgan uchrashuvda aytib o‘tdi.
«Bu borada hozir men qandaydir aniq reja bor deb o‘ylamayman. Lekin masofadan turib bank kartalarini yopishda hech qanday muammo ko‘rmayapman. Bu tizimni jurnalistlar va mutaxassislar bilan chuqur o‘rganib chiqishimiz lozim», — dedi Markaziy bank rahbari.
Ishmetovning qo‘shimcha qilishicha, bank kartalari bilan o‘rnatilgan cheklov 1 yilga amal qiladi va komplaens tizimini rivojlantirish hisobiga bu tizimni o‘zgartirish ko‘rib chiqilmoqda.
«Aynan komplaens bilan bu masalani ko‘rib chiqayotganda, bank kartalarini yopishda ham masofadan amaliyotni joriy qilishni ko‘rib chiqamiz. Bunda muammo ko‘rmayapmiz», — dedi Markaziy bank rahbari.
Avvalroq Kursiv Uzbekistan limitdan tashqari ochilgan plastik kartalarning taqdiri nima bo‘lishi haqida xabar bergan edi.
