Apple yangi avlod smartfonlari orqali turli auditoriyalarga mo‘ljallangan ikki xil konsepsiyani taqdim etdi. iPhone 17 Pro Max professional foydalanuvchilar uchun mo‘ljallangan qudratli model. iPhone Air eng yupqa va eng yengil iPhone bo‘lib, ixchamlik va nafislikni qadrlovchilar uchun ishlab chiqilgan. Gizmochina nashri tomonidan iPhone 17 Pro Max va iPhone Air smartfonlari taqqoslandi.
Ushbu maqoladan quyidagilarni bilib olasiz:
Dizayn va displey
iPhone 17 Pro Max alyuminiy qotishmasi va Ceramic Shield 2 orqa panelidan foydalanadi. Bu mustahkamlik va nafislikni uyg‘unlashtiradi. iPhone Air esa 5-darajali titan ramkasi va Ceramic Shield oynasi bilan taqdim etilgan. Titan tufayli u yanada engil, nozik va premium ko‘rinishga ega. Portativlikni qadrlaydiganlar uchun Air ancha qulayroq variant.
Har ikkala qurilmada ham 120Hz yangilanish tezligiga ega LTPO Super Retina XDR OLED panellari mavjud. HDR10, Dolby Vision va 3000 nitgacha yorqinlikni qo‘llab-quvvatlaydi. Pro Max’da 6,9 dyuymli katta ekran va yuqoriroq aniqlik mavjud bo‘lsa, Air modeli 6,5 dyuymli ixcham displey bilan taqdim etilgan (460 ppi). Media va o‘yinlar uchun Pro Max qulayroq, biroq ixchamlik tarafdorlari Air’dan mamnun bo‘lishadi.
Immersiv tomosha va kontent yaratish uchun iPhone 17 Pro Max afzal, ixcham va yengil qurilma izlayotganlar uchun esa iPhone Air mos keladi.
Texnik xususiyatlar
Har ikkala model ham 3nm texnologiyada yaratilgan Apple A19 Pro chipsetida ishlaydi. Biroq Pro Max 6 yadroli GPU bilan, Air esa 5 yadroli GPU bilan jihozlangan. Shuning uchun og‘ir grafik talab qiladigan o‘yinlar va videomontaj uchun Pro Max biroz ustun. Oddiy kundalik foydalanishda esa farq sezilmaydi.
iPhone 17 Pro Max’da 4832–5088 mA·soat sig‘imli katta batareya mavjud bo‘lib, Air’da bu ko‘rsatkich 3149 mA·soatni tashkil etadi. Tezkor quvvatlashda ham Pro Max oldinda: 20 daqiqada 50% gacha, Air esa 30 daqiqada. Simsiz quvvatlash tezligi ham mos ravishda 25W va 20W. Demak, uzoq muddat foydalanadigan foydalanuvchilar uchun Pro Max ancha ishonchli.
Ishlash deyarli bir xil, ammo kuchliroq GPU va ancha katta batareya tufayli iPhone 17 Pro Max ancha samarali tanlov.
Kamera imkoniyatlari
iPhone 17 Pro Max uch karra kamera tizimiga ega: 48 MP asosiy, 48 MP periskop telefoto (4x optik zum), 48 MP ultrakengaytirilgan kamera va LiDAR skaneri. iPhone Air esa faqat bitta 48 MP asosiy kameraga ega. Demak, suratga olish va professional video ishlov berishda Pro Max ancha ustun.
Har ikkala modelda ham 18 MP old kamera, SL 3D sensorlar, Dolby Vision HDR va 4K video yozuv imkoniyati mavjud. Bu qismda farq yo‘q.
Xulosa: Fotografiya va video bilan jiddiy shug‘ullanuvchilar uchun Pro Max eng yaxshi variant. Air esa faqat oddiy suratga olishni xohlovchilar uchun yetarli.
Narx
iPhone 17 Pro Max narxi taxminan $1200, iPhone Air esa $1000. Narxdagi $200 farq Pro Max’dagi qo‘shimcha kameralar, katta ekran, kuchli GPU va katta batareya bilan izohlanadi. Portativlik va titan dizayni muhim bo‘lganlar uchun Air yaxshi variant, biroq ilg‘or imkoniyatlarni xohlovchilar uchun Pro Max qo‘shimcha xarajatga arziydi.
Yakuniy xulosa
iPhone 17 Pro Max ko‘p funksiyali kamera tizimi, kuchli GPU va katta batareyasi bilan professional foydalanuvchilar va kontent yaratuvchilar uchun eng yaxshi tanlov. iPhone Air esa o‘zining yupqaligi, yengilligi va titan korpusi bilan ixchamlikni qadrlaydigan auditoriyaga mo‘ljallangan.
Eslatib o‘tamiz, Kursiv Uzbekistan nashri real vaqtda tarjima qilish funksiyasiga ega Apple AirPods Pro 3 quloqchinlari taqdim etilgani haqida yozgan edi.
