Apple yaqinda iPhone 17 Pro Max modelini taqdim etdi. U 2025-yilning eng kuchli smartfonlaridan biri bo‘lishi kutilmoqda. Uning asosiy raqibi esa allaqachon bozorda o‘z o‘rnini egallagan Samsung Galaxy S25 Ultra. Har ikki flagman premium segmentga mansub. Ular dizayn, ishlash tezligi, kamera imkoniyatlari va batareya quvvati bilan ajralib turadi. Ushbu maqolada iPhone 17 Pro Max va Samsung Galaxy S25 Ultra smartfonlari taqqoslanadi.
Dizayn va ekran
Apple iPhone 17 Pro Max’da kvadrat kamera blokini olib tashladi. U Pixel uslubidagi kamera panelini joriy qildi. Yangi avlodda yorqin ranglar paydo bo‘lgan. Samsung esa S22 Ultra’dan beri tanish dizaynni saqlab qolgan.
Ikkala qurilmada ham 6,9 dyuymli 120 Hz OLED displey bor. Samsung yuqori aniqlik (3 120 × 1 440) bilan biroz ustunlik qiladi. iPhone 17 Pro Max displeyi 2 868 × 1 320 piksellarni taklif etadi. Bundan tashqari, Galaxy S25 Ultra’dagi S Pen qo‘shimcha imkoniyatlar beradi. Apple esa hanuz iPhone’larda Pencil’ni qo‘llab-quvvatlamaydi.
Ishlash va batareya
iPhone 17 Pro Max yangi Apple A19 Pro chipida ishlaydi va 12 GB RAM olgan — bu Apple smartfonlari uchun yangilik. Galaxy S25 Ultra esa Snapdragon 8 Elite for Galaxy chipseti va 12 GB RAM bilan ta’minlangan.
Apple bu safar batareyani ham kuchaytirdi: 5 088 mA·soat (ba’zi versiyalarda 4 823 mA·soat). Samsung Galaxy S25 Ultra’da esa 5 000 mA·soat batareya mavjud. Oldingi testlarda iPhone 16 Pro Max allaqachon S25 Ultra’dan uzoqroq ishlagan edi, shuning uchun yangi model ham samaradorlik bo‘yicha ustun bo‘lishi kutilmoqda.
Kamera imkoniyatlari
Samsung Galaxy S25 Ultra hozirgi vaqtda bozordagi eng kuchli kamerali telefonlardan biri: 200 MP asosiy kamera, 50 MP ultra keng, 50 MP 5x periskop va 10 MP 3x telefoto moduliga ega. iPhone 17 Pro Max esa uchta 48 MP kameradan foydalanadi — asosiy, ultrakeng va 4x optik zumli periskop. Apple yangi telefoto sensorining 56 foizga kattalashganini ta’kidlamoqda, bu esa tungi suratlarda sezilarli natija berishi mumkin.
Eslatib o‘tamiz, Kursiv Uzbekistan nashri iPhone 17 Pro Max va iPhone Air smartfonlarini taqqoslagan edi.
