Bugun, 15-sentabrdan boshlab Ostonada kommunal korxonalar va davlat korxonalarining ish vaqti o‘zgartirildi. Bu haqda shahar hokimligi xabar berdi.
Mazkur o‘zgarishlar shahar ko‘chalaridagi tirbandlikni 15 – 20 foizga kamaytirishi kutilmoqda. Maktablar va tibbiyot muassasalari esa eski jadval asosida ishlashni davom ettiradi.
Faqat kommunal korxonalar ertalab soat 7:30 da ish boshlaydi, shahar hokimiyati ham xuddi shu vaqtda faoliyatini boshlaydi. Ayrim davlat organlari va yarim davlat kompaniyalari esa 7:30 – 8:00 oralig‘ida ishga kirishadi.
Shuningdek, taqiqlangan joylarda mashinalarni to‘xtatish va qo‘yib ketish qoidalariga rioya qilinishi yuzasidan nazorat kuchaytiriladi. Qoidabuzarlarning mashinalari jarima maydonchasiga olib ketiladi. Jamoat transporti uchun tezkor yo‘lak va yangi yo‘nalishlar ham tashkil etilmoqda.
O‘zbekiston qonunchiligiga asosan, xodim uchun ish vaqtining normal muddati haftasiga qirq soatdan ortiq bo‘lishi mumkin emas. Shu bilan birga, olti kunlik ish haftasida har kungi ishning muddati yetti soatdan, besh kunlik ish haftasida esa sakkiz soatdan ortib ketmasligi lozim.
Avvalroq O‘zbekistonda pensiya yoshini oshirish masalasi jamoatchilik muhokamasiga qo‘yilishi haqida xabar berilgandi. Unga ko‘ra, pensiya yoshining minimal ko‘rsatkichini erkaklar uchun 63 yoshga, ayollarga esa 58 yoshga oshirish taklif qilinmoqda. Bu haqda Pensiya jamg‘armasi matbuot xizmati rahbari Bahriddin Ziyatov Kursiv’ga ma’lum qildi.
