Buick kompaniyasi tomonidan yangi Buick Electra L7 EREV avtomobili rasman namoyish qilindi. Bu haqda CarNewsChina xabar bermoqda.
Electra-L konseptidan ilhomlangan ushbu avtomobil 28-sentabr kuni oldindan buyurtmaga ochiladi. Model Xiaoyao Architecture platformasida ishlab chiqilgan bo‘lib, 1,5T kengaytirilgan gibrid tizimga ega.
U toza elektr rejimida 302 km masofani bosib o‘ta oladi, umumiy yurish zaxirasi esa 1400 km dan oshadi. Kuch qurilmasi SAIC-GM ishlab chiqargan 1,5T LD3 benzinli motor va 252 kVt quvvatga ega elektromotordan iborat bo‘lib, avtomobilni 0 dan 100 km/soat tezlikka atigi 5,9 soniyada olib chiqadi. Yonilg‘i sarfi 100 km uchun o‘rtacha 0,5 litrni tashkil etadi, Ultium batareyasining sig‘imi esa 40,2 kVt/soatga teng.
Electra L7 tashqi ko‘rinishda Buick oilasiga xos Starry Sky Wing optikasi, faol radiator panjarasi va orqa tomonida to‘liq chiziqli LED faralari bilan jihozlangan. Avtomobilning o‘lchamlari 5032×1952×1500 mmni tashkil etadi, g‘ildirak bazasi esa 3000 mmga teng.
Salon dizayni ham zamonaviy texnologiyalar bilan boyitilgan. Yangi avlod D shaklidagi aqlli rul ustuni va ustun uslubidagi shifter bilan uyg‘unlashtirilgan. Old panelda 10,25 dyuymli raqamli asboblar paneli, markazda 15,6 dyuymli sensorli boshqaruv ekrani va 50 dyuymli kengaytirilgan AR-HUD displeyi joylashgan.
AR-HUD tizimi 15 dan ortiq ma’lumot turini kamera, LiDAR va radar yordamida real yo‘l sharoitiga moslab aks ettira oladi. Markaziy ekran esa bo‘linadigan interfeys orqali navigatsiya, media va boshqa funksiyalarni bir vaqtning o‘zida boshqarish imkonini beradi.
Avtomobil aqlli funksiyalar bilan ham ta’minlangan. Unda past quvvatli Sentry Mode xavfsizlik tizimi mavjud bo‘lib, yuqori aniqlikdagi kameralar va IMU sensorlari yordamida atrof-muhitni kuzatadi va xavfni uch bosqichda tahlil qiladi. Bundan tashqari, Electra L7 Apple CarPlay, Huawei HiCar, Xiaomi, Oppo va Vivo CarLink tizimlarini qo‘llab-quvvatlaydi.
Eslatib o‘tamiz, Kursiv Uzbekistan Voyah Dreamer 2026 avtomobili haqida yozgan edi.
