Xiaomi 17 Pro Max kamerasi haqida yangi ma’lumotlar paydo bo‘ldi. Bu haqda Gizmochina texnologiyalar nashri xabar bermoqda.
Xiaomi 17, 17 Pro va 17 Pro Max modellari sentabr oxirigacha taqdim etilishi kutilmoqda. Ularning barchasi Qualcomm’ning yaqin kunlarda rasman namoyish etiladigan Snapdragon 8 Elite Gen 5 protsessori bilan ishlaydi. Ammo xaridorlar uchun asosiy savol baribir kameraga taqalmoqda, chunki u Leica bilan hamkorlikda ishlab chiqilgan.
Ma’lumotlarga ko‘ra, Pro Max kamerasi asosan 17 Pro bilan bir xil. Ikkala model ham 50 MP asosiy sensor (f/1.67 diafragma) va 17 mm keng ultrakeng linza bilan jihozlanadi. Leica sozlagan bu tizim yuqori aniqlik va tabiiy rang balansi bilan ajralib turadi.
Asosiy farq telefoto linzada ko‘rinadi. Ikkala model ham 5x optik zum taklif qilsa-da, Pro Max’da diafragma f/2.6, Pro‘da esa f/3.0 bo‘lishi aytilmoqda. Bu kichik o‘zgarish tungi suratga olishda ko‘proq yorug‘lik tushishini ta’minlab, portretlarda yanada yumshoq bokeh effektini yaratishi mumkin.
Mutaxassislar fikricha, bu o‘zgarish Pro Max modelini zumga katta urg‘u beradigan raqiblarga qarshi kuchliroq raqibga aylantirishi mumkin. Kutilayotgan taqdimotda Xiaomi yangi flagmanlari bilan bozorda yana bir bor katta qiziqish uyg‘otishi aniq.
Eslatib o‘tamiz, Kursiv Uzbekistan nashri Xiaomi 17 Pro dizayni oshkor bo‘lgani haqida yozgan edi. Uning asosiy o‘ziga xosligi kamera blokida joylashgan qo‘shimcha ekranidir.
