O‘zbekistonda yer sohasida korrupsiyaning oldini olish bo‘yicha yangi tizim joriy etiladi

Endi yerga oid munosabatlarda korrupsion omillarni bartaraf etish mexanizmlari yanada kuchaytiriladi. Bu haqda Adliya vazirligi ma’lum qildi.

Unga ko‘ra, Kadastr agentligining «E-Yer Nazorat» tizimi davlat yer nazoratini yuritishning yagona elektron platformasi sifatida ishlaydi. 2026-yil 1-yanvardan boshlab yer qonunchiligiga oid huquqbuzarliklarni aniqlash va choralar ko‘rish faqat ushbu tizim orqali amalga oshiriladi.

Hududlar uch toifaga ajratiladi:
«qizil» – yerlarni noqonuniy egallash xavfi yuqori;
«sariq» – xavfi o‘rtacha;
«yashil» – xavfi past hududlar.

Monitoring jarayonida «qizil» hududlar dronlar yordamida har chorakda, «sariq» hududlar esa maxsus samolyot orqali har 6 oyda kuzatib boriladi.

Eslatib o‘tamiz, avvalroq O‘zbekistonda «Oasis» yagona raqamli platformasi yaratilishi haqida xabar qilgan edik.