Changan, Huawei va CATL hamkorligida yaratilgan yangi Avatr 07 2026 modeli Xitoy bozoriga chiqdi. Bu haqda CarNewsChina xabar bermoqda.
Mashina 219 900 yuandan ($31 910) boshlanadigan narxda taklif qilinmoqda. Narx o‘zgarishsiz qolgan bo‘lsa-da, avtomobilning jihozlari yangilandi. Avatr 07 ikkita variantda sotiladi — BEV (to‘liq elektr) va EREV (generatorli gibrid).
Avatr brendi 2022-yildan beri faoliyat yuritib kelmoqda va hozirda to‘rtta modelni ishlab chiqaradi.
Yangilangan Avatr 07 avvalgi dizaynini saqlab qolgan. Mashina ikki qavatli chiroqlar, bamperga integratsiya qilingan faralar, qiya kapot, tomdagi LiDAR sensori va yashirin eshik tutqichlari bilan jihozlangan. Orqa qismda esa ikki chiziqli chiroqlar joylashtirilgan.
SUV o‘lchamlari 4825/1980/1610 mm, g‘ildirak bazasi 2940 mm. Aerodinamik koeffitsient 0,259 Cd bo‘lib, Tesla Model Y’ning 0,220 Cd ko‘rsatkichidan yuqoriroq, ammo baribir energiya sarfini kamaytirishga xizmat qiladi.
Salon yangi och jigarrang rang sxemasida bezatilgan. Markaziy konsolda ulkan 35,4 dyuymli 4K ekran, haydovchi uchun esa 15,6 dyuymli HarmonyOS 5 tizimidagi monitor o‘rnatilgan. Standart jihozlar qatorida 25 dinamikli Meridian audio tizimi, raqamli orqa ko‘zgular va nol-gravitatsiyali old o‘rindiqlar bor.
Avatr 07 Huawei’ning ADS 4 haydovchiga yordam tizimi bilan jihozlangan. U avtomatlashtirilgan yo‘l bo‘yicha harakatlanishni (NOA), avtoparkovkani qo‘llaydi va favqulodda to‘xtash funksiyasi orqali 130 km/soat tezlikda ham xavfsiz to‘xtay oladi. Shuningdek, yangilangan osma tizimi qulaylikni oshirgan.
CATL ishlab chiqargan 39 kVt/soat va 52 kVt/soat LFP Freevoy batareyalari o‘rnatiladi. To‘liq elektr yurish zaxirasi CLTC bo‘yicha 245–333 km, umumiy aralash yurish masofasi esa 1115–1200 km ni tashkil qiladi.
Eslatib o‘tamiz, Kursiv Uzbekistan Avatr 07 2026 avtomobili 4-sentabrdan oldindan savdoga chiqishi haqida yozgan edi.
