Vivo kompaniyasi tomonidan Tayvanda yangi Vivo V60 Lite 5G smartfoni taqdim etildi. Bu haqda Gizmochina xabar bermoqda.
U V60 seriyasidagi o‘rta segment model sifatida joylashgan bo‘lib, katta AMOLED displey, yangi Dimensity 7360-Turbo chipi, yupqa va suvdan himoyalangan korpus hamda 6 500 mA/soat sig‘imli kuchli akkumulyator bilan ajralib turadi.
Smartfon 6,77 dyuymli AMOLED ekranga ega bo‘lib, FHD+ (2392×1080) aniqlikda, 120 Hz yangilanish tezligida ishlaydi va HDR10+ formatini qo‘llab-quvvatlaydi. Old panelda 32 megapikselli kamera joylashgan. Orqa tomonda esa Sony IMX882 asosiy 50 megapikselli sensor (OIS bilan) va 8 megapikselli ultra-keng moduldan iborat ikkitalik kamera o‘rnatilgan. Qurilma Android 15 operatsion tizimida Funtouch OS 15 interfeysi bilan ishlaydi.
Yuragi sifatida yangi MediaTek Dimensity 7360-Turbo protsessori ishlatilgan. U 12 GB gacha tezkor xotira (yana 12 GB virtual RAM qo‘shilishi mumkin) va 256 GB UFS 3.1 xotira bilan birga taklif qilinadi. 6 500 mA/soatli batareya 90 Vt tezkor quvvatlashni qo‘llab-quvvatlaydi.
Qo‘shimcha imkoniyatlar orasida ekranga o‘rnatilgan barmoq izi skaneri, ikki dinamikli audio tizim, NFC, Wi-Fi 6, Bluetooth 5.4 va USB-C bor. Qurilma chang va suvga chidamlilik bo‘yicha IP65 sertifikatiga ega. Uning qalinligi 7,59-7,69 mm atrofida, vazni esa 194 gramm.
Narxlar Tayvan bozorida quyidagicha belgilangan: 8/256 GB versiyasi taxminan $460, 12/256 GB modeli esa taxminan $495. Rang variantlari sifatida Vitality Pink, Titanium Mist Blue va Midnight Black taklif etiladi.
Eslatib o‘tamiz, Kursiv Uzbekistan Vivo Y50i smartfoni Xitoyda taqdim etilgani haqida yozgan edi.
