Xitoyda Changan CS55 Plus to‘rtinchi avlodining rasmiy savdosi boshlandi. Bu haqda ITHome texnologiyalar nashri xabar bermoqda.
Model to‘rtta komplektatsiyada taklif etilmoqda, dastlabki xaridorlar uchun narxlar 78,9 ming yuandan ($10 ming) boshlanadi.
Yangi CS55 Plus oldingi avloddan kattaroq bo‘lib, uning gabaritlari 4550 x 1868 x 1675 mm, g‘ildirak bazasi esa 2656 mmni tashkil etadi. Salon ichida 10,25 va 14,6 dyuymli ekranlar o‘rnatilgan. Qimmatroq versiyalarda Tianshu Driving Assistance haydovchiga yordamchi tizimlari mavjud. Qulaylik uchun ergonomik shakldagi o‘rindiqlar ishlab chiqilgan, old yo‘lovchiga esa ventilyatsiya, isitish va massaj funksiyali «korol kreslo» taklif etiladi.
Kapoti ostida 1,5 litrli yangi avlod Blue Whale turbomotori joylashgan. Bu Changan uchun ilk marta 500 bar bosimdagi yonilg‘i purkash tizimiga ega motor bo‘lib, 191 ot kuchi quvvat va 310 Nm maksimal moment ishlab chiqaradi. Bitta benzin baki bilan avtomobil 1000 km masofani bosib o‘ta oladi.
Eslatib o‘tamiz, Kursiv Uzbekistan nashri Changan CS55 Plus’ning yangi avlodi savdoga chiqqani haqida yozgan edi.
