Honor o‘zining navbatdagi flagman seriyasi Magic 8 uchun tayyorgarlik ko‘rmoqda. Kompaniya e’lon qilgan yangi suratlar smartfonning old dizaynini ko‘rsatdi. Bu haqda Gizmochina nashri ma’lum qildi.
Dizayn va tashqi ko‘rinish
Tashqi tomondan Magic 8 avvalgi Magic 7’ga juda o‘xshaydi, ammo ayrim muhim o‘zgarishlar bor. Eng ko‘zga tashlanadigan yangilik — yirik yumaloq burchaklarga ega tekis displey, kompaniya uni R-burchakli flat screen deb atamoqda. Yangi to‘g‘ri burchakli ramka esa smartfonga yanada ixcham va zamonaviy ko‘rinish beradi. Avvalgi modellardagi egri qirralardan farqli ravishda, bu safar 90 darajalik aniq burchaklar qo‘llanilgan.
Orqa panelda esa tanish doira shaklidagi kamera bloki joylashgan. Unda to‘rt xil kesma mavjud bo‘lib, ularning uch nafari linza, biri esa chuqurlik sensori bo‘lishi kutilmoqda. Ma’lumotlarga ko‘ra, Magic 8 Pro versiyasi 200 megapikselli yangi telefoto kamera bilan sinovdan o‘tkazilmoqda.
Yangi tugma va AI imkoniyatlari
Diqqatga sazovor jihatlardan yana biri — quvvat tugmasi ostida joylashgan mutlaqo yangi qo‘shimcha tugma. Honor uni kamera uchun emas, balki maxsus AI tugmasi sifatida taqdim etdi. To‘liq vazifalari hozircha sir tutilmoqda, biroq kompaniya uni «Magic Color», «AI retouching» va «bir bosishda foto kengaytirish» kabi sun’iy intellekt funksiyalari bilan bog‘lashni rejalashtirmoqda.
Texnik imkoniyatlar
Honor Magic 8 seriyasi Qualcomm’ning yangi avlod Snapdragon 8 Elite Gen 5 chipida ishlaydi. Ushbu protsessor tezroq ishlash, energiya samaradorligi va kuchaytirilgan on-device AI imkoniyatlarini taqdim etishi kutilmoqda. Bu esa Honor’ning sun’iy intellekt strategiyasi bilan mos keladi.
Chiqarilish sanasi
Honor Magic 8 seriyasi va MagicPad 3 Pro plansheti 15-oktabr kuni Xitoyda taqdim etiladi. Jahon bozoriga esa 2026-yil boshida chiqishi kutilmoqda.
Avvalroq Kursiv Uzbekistan sotib olishga arziydigan 5 ta eng yaxshi Honor smartfoni haqida xabar bergan edi.
