Toshkent va Qoraqalpog‘istonda noqonuniy valyuta ayirboshlovchilar ushlandi

Bosh prokuratura huzuridagi Departament xodimlari tomonidan o‘tkazilgan tezkor tadbirlarda bir nechta shaxslar noqonuniy valyuta ayirboshlash bilan shug‘ullangani uchun qo‘lga olindi.

Toshkent viloyatida o‘tkazilgan reydda ilgari sudlangan Sh.I. $4 mingni fuqaroga 49,4 mln so‘mga sotayotgan vaqtida ushlandi.

Shu kabi holat Toshkent shahrining Shayxontohur tumanida ham qayd etildi. Bu yerda fuqaro $4 mingni 50 mln so‘mga sotishini aytib, xaridorga 2 ming dollar bergan vaqtida qo‘lga olindi. Tekshiruv davomida olingan pullardan $100 lik banknota qalbakiligi aniqlangan.

Qoraqalpog‘istonning To‘rtko‘l tumanida ham ikki shaxs fuqarodan 2 ming AQSh dollari hamda 150 ming Rossiya rublini 45,8 mln so‘mga sotib olayotganda ushlangan.

Mazkur holatlar yuzasidan Jinoyat kodeksining 176-moddasi (qalbaki pul yoki qimmatli qog‘ozlar yasash va tarqatish) hamda 177-moddasi (valyuta qimmatliklarini qonunga xilof ravishda olish yoki o‘tkazish) bilan jinoyat ishlari qo‘zg‘atildi. Hozirda tergov harakatlari olib borilmoqda.

Avvalroq Kursiv Uzbekistan 26-sentabr kuni xorijiy valyutalarni qaysi banklarda qulay narxda almashtirish mumkinligi haqida yozgan edi.