Dongfeng kompaniyasi tomonidan yangi Dongfeng M817 Max+ avtomobili taqdim etildi. Bu haqda CarNewsChina xabar bermoqda.
Yangi avtomobil Xitoy bozorida 369 900 yuan, ya’ni $51,2 mingdan sotuvga chiqqan. Model yuqori darajadagi off-road SUV sifatida ishlab chiqilgan bo‘lib, katta quvvatli batareya va zamonaviy texnologiyalar bilan ajralib turadi.
Model haqida
M817 Max+ o‘lchamlari 5100×1998×1899 millimetrni tashkil etadi, g‘ildiraklar bazasi esa 3005 millimetr. Off-road imkoniyatlari kengaytirilgan. Avtomobil 31 darajali yondashish va chiqish burchaklari, 20 darajali o‘tkazuvchanlik burchagi hamda 237 millimetr balandlikdagi yo‘l oralig‘i bilan jihozlangan. Suv to‘sqinliklarini yengib o‘tishda ham u kuchli ko‘rsatkichga ega bo‘lib, maksimal chuqurlik 820 millimetrni tashkil etadi.
Ichki qismi
Salon ichki qismi Pine Ink, Mountain Grey va Danxia Brown rang variantlarida taklif qilinadi. Avtomobil zamonaviy HarmonySpace 5 aqlli kokpit tizimi bilan to‘ldirilgan. Quvvat tizimida 1,5 litrli turbomotor va elektr motorlari kombinatsiyasi ishlatilgan bo‘lib, umumiy quvvati 505 kVt (677 ot kuchi) va 848 N·m aylanish momentini beradi. 50,4 kVt·soatli CATL Freevoy batareyasi yordamida avtomobil CLTC bo‘yicha 215 kilometr sof elektr masofasini bosib o‘ta oladi. Umumiy masofa esa 1365 kilometrga yetadi.
Avtomobil ikki pog‘onali PHEV arxitekturasi va to‘liq g‘ildirakli tortish tizimi bilan jihozlangan. Haydovchilar benzinli, elektr, kengaytirilgan masofa yoki gibrid rejimlarni tanlashi mumkin. Shuningdek, turli yo‘l sharoitlariga mos to‘qqiz xil haydash usuli ham mavjud.
Qo‘shimcha texnik xususiyatlari
M817 Max+ aqlli boshqaruv imkoniyatlari bilan ham e’tibor qozonadi. U Huawei’ning Qiankun ADS 4 tizimi asosida ishlaydi. Tizim navigatsiyali kruiz nazorati va to‘liq avtomatik parkovka funksiyalarini qo‘llab-quvvatlaydi. Mashina 27 sensor bilan jihozlangan bo‘lib, ular orasida 11 ta HD kamera, uchta 4D millimetrli radar, bitta 192-liniyali lidar va 12 ta ultratovush radari mavjud.
Eslatib o‘tamiz, Kursiv Uzbekistan yangi Voyah Taishan avtomobili taqdim etilgani haqida yozgan edi.
