Google o‘zining yangi Pixel 10 smartfonini taqdim etdi. Samsung esa ilgariroq Galaxy S25 modelini bozorga olib chiqqan edi. Har ikkisi ham ixcham flagmanlar segmentida kuchli o‘yinchilar sanaladi. Savol tug‘iladi: qaysi biri yaxshiroq? Quyidagi maqolada Google Pixel 10 yoki Samsung Galaxy S25 smartfonlari dizaynidan tortib, ekran va kameralarigacha taqqoslanadi.
Dizayn va ergonomika
Google Pixel 10 alyuminiy korpus va Gorilla Glass Victus 2 bilan himoyalangan old va orqa qoplamaga ega. Orqa paneli mat shisha bilan ishlangan bo‘lib, qo‘lda yoqimli turadi. Qurilma og‘irligi 204 gramm, qalinligi 8,6 mm bo‘lgani uchun bir qo‘l bilan foydalanish mumkin, biroq ancha zich seziladi.
Samsung Galaxy S25 korpusi ham mustahkam alyuminiydan tayyorlangan va Gorilla Glass Victus 2 bilan himoyalangan. Orqa paneli yaltiroq shisha bo‘lgani sababli tezda chang va izlarni yig‘adi, ammo oddiygina g‘ilof bilan bu muammo bartaraf etiladi. S25 ergonomikada Pixelni ancha ortda qoldiradi: og‘irligi atigi 162 gramm, qalinligi esa 7,2 mm.
Har ikkisi ham IP68 himoya standartiga ega: yomg‘irda ham, qisqa vaqtli suvga tushib ketishda ham bardoshli.
Ekran
Galaxy S25 6,2 dyuymli Dynamic LTPO AMOLED displey bilan ta’minlangan. Uning yangilanish tezligi 120 Hz, piksellar zichligi ~416 ppi, HDR10+ qo‘llab-quvvatlanadi va yorqinligi 2600 nitga yetadi. Video ko‘rish, o‘yin o‘ynash va ijtimoiy tarmoqlarni varaqlash uchun juda mos.
Pixel 10 esa 6,3 dyuymli OLED panel bilan jihozlangan. Uning ham yangilanish tezligi 120 Hz, piksellar zichligi ~422 ppi, HDR10+ mavjud, yorqinligi esa 3000 nitgacha ko‘tariladi. Ranglar biroz jonliroq va yorqinroq ko‘rinadi. Shu bilan birga, Galaxy S25 ekrani ultra yupqa ramkalari bilan yanada premium taassurot qoldiradi.
E’tiborli jihati, ikkala modelda ham PWM chastotasi 480 Hz bo‘lgani uchun, uzoq muddat foydalanishda sezgir ko‘zlarda diskomfort tug‘dirishi mumkin.
Ishlash quvvati
Google Pixel 10 yangi Tensor G5 chipida ishlaydi, unga 12 GB tezkor xotira va UFS 3.1 tipidagi xotira biriktirilgan. Kundalik vazifalar, suratga olish va hatto o‘yinlarni o‘rta grafik sozlamalarda ishlatishda muammosiz. Ammo hardcore ge’yming uchun yetarli darajada quvvatli emas.
Samsung Galaxy S25 maxsus optimallashtirilgan Snapdragon 8 Elite for Galaxy protsessorida ishlaydi. 12 GB tezkor xotira va zamonaviy UFS 4.0 xotira bilan birga keladi. Kuchli optimizatsiya hisobiga og‘ir o‘yinlarda ham barqaror 60 FPS ko‘rsatadi. Genshin Impact yoki Zenless Zone Zero kabi og‘ir tahlillar uchun Galaxy S25 ancha qulayroq tanlov.
Kameralar
Galaxy S25 uchli modulga ega: 50 MP asosiy sensor, 12 MP ultra-keng burchakli kamera va 12 MP telefotoga ega bo‘lib, optik stabilizatsiya va 3x optik zum bilan ta’minlangan. Old kamera 12 MP. Natijada suratlar tabiiy ranglarda chiqadi.
Pixel 10 esa 48 MP asosiy kamera, 10,8 MP keng burchakli modul va 13 MP telefotoga ega. Bu yerda 5x optik zum, lazerli autofokus va Ultra HDR rejimi mavjud. Old kamera 10,5 MP. Pixel algoritmlari suratlarni biroz «yaxshilab» beradi, kontrast va aniqlikni oshiradi, bu esa ko‘pchilikka yoqadi.
Samsung tabiiyroq natija bersa, Pixel algoritmik jihatdan yorqinroq va dinamikroq tasvirlarni taqdim etadi.
Dasturiy ta’minot
Pixel 10 Android’ning toza versiyasi asosidagi Pixel UI bilan ishlaydi. Unda keraksiz dasturlar yo‘q, interfeysi minimalistik va silliq animatsiyalarga ega. Asosiy afzallik — Google’ning kuchli AI imkoniyatlari: suratlarni tahrirlash, matn va nutqni qayta ishlash kabi funksiyalar mavjud.
Galaxy S25 esa One UI 7 qobig‘ida ishlaydi. Bu interfeys vizual jihatdan rang-barangroq, funksiyalari ko‘p va kengroq sozlash imkoniyatlari mavjud. Samsung o‘zining Galaxy AI tizimi orqali surat va videolarni tahrirlash, matn tarjima qilish va ovoz bilan ishlashni sezilarli darajada yengillashtirgan.
Eslatib o‘tamiz, Kursiv Uzbekistan nashri Xiaomi 17 Pro smartfoni haqida yozgan edi.
