Jizzax viloyatining Baxmal tumanida joriy yil oxirigacha umumiy qiymati 22,2 mlrd so‘mlik to‘qqizta turizm loyihasini amalga oshiriladi. Bu haqda Turizm qo‘mitasi Kursiv Uzbekistan muxbiriga ma’lum qildi.
Tuman hokimligi ma’lumotlariga ko‘ra, 1-oktabr holatiga qadar yetti mlrd so‘mlik to‘rtta loyiha foydalanishga topshirilgan. Qolgan loyihalar bo‘yicha qurilish va montaj ishlari davom etmoqda.
Baxmal tumani Tojikiston va Samarqand viloyati bilan chegaradosh. Uning maydoni 1,86 ming kvadrat kilometrni, aholisi esa 174,2 ming kishini tashkil etadi. Hududning qariyb 50 foizini tog‘lar egallagan bo‘lib, bu ekoturizmni mintaqa rivojlanishining asosiy yo‘nalishlaridan biriga aylantiradi.
Tumanda «Novka ota», «Usmat ota», «Bog‘imozor ota», «Xo‘jakundalang» kabi o‘nlab ziyoratgohlar, shuningdek 68 dan ortiq arxeologik yodgorliklar mavjud. Bundan tashqari, bu yerda turizm salohiyati yuqori bo‘lgan to‘qqizta qishloq joylashgan.
Eslatib o‘tamiz, avvalroq O‘zbekiston va Trabzon o‘rtasida turizm hamkorligi yo‘lga qo‘yilishi haqida xabar bergan edik.
