O‘zbekistonda mayning uchun elektr energiyasiga imtiyozli tarif joriy etiladi

O‘zbekistonda mayning uchun elektr energiyasiga imtiyozli tarif joriy etiladi. Bu haqda Istiqbolli loyihalar milliy agentligi (ILMA) direktorining birinchi o‘rinbosari Vyacheslav Pak «O‘zbekiston 24» telekanaliga bergan intervyusida ma’lum qildi.

Uning so‘zlariga ko‘ra, prezident sun’iy intellekt sohasini samarali rivojlantirish, amaliyotga tatbiq etish hamda malakali mutaxassislar tayyorlash bo‘yicha aniq chora-tadbirlarni tasdiqlagan. Shuningdek, oliy ta’lim muassasalari huzurida maxsus laboratoriyalar tashkil qilish rejalashtirilmoqda.

Vyacheslav Pakning ta’kidlashicha, Qoraqalpog‘istonda sun’iy intellekt yo‘nalishidagi loyihalarga umumiy qiymati $100 mln miqdorida imtiyoz va preferensiyalar ajratiladi. Ushbu qo‘llab-quvvatlash mexanizmi mayning sohasini ham qamrab oladi.

«Qo‘llab-quvvatlash mayning sohasini ham qamrab oladi», dedi ILMA vakili.

Mazkur tashabbus mamlakatda raqamli texnologiyalar, xususan, blokcheyn va sun’iy intellekt sohalarida innovatsion muhitni kengaytirishga xizmat qiladi.

Eslatib o‘tamiz, «Kursiv» O‘zbekiston to‘lovlarda steyblkoinlardan foydalanishni rejalashtirayotgani haqida yozgan edi.