Saida Mirziyoyeva Buyuk Britaniya G‘aznachiligi iqtisodiy kotibi bilan uchrashdi

Londonda tashkil etilgan roud-shou doirasida O‘zbekiston prezidenti yordamchisi Saida Mirziyoyeva Buyuk Britaniya G‘aznachiligi iqtisodiy kotibi Lyusi Rigbi bilan uchrashuv o‘tkazdi. Bu haqda u o‘z Telegram sahifasida ma’lum qildi.

Uchrashuvda «Yangi O‘zbekiston – ulkan imkoniyatlarga ega katta mamlakat» nomli tadbirda Rigbi xonimning ishtiroki va qo‘llab-quvvatlashi uchun minnatdorlik bildirildi.

Tomonlar O‘zbekistondagi islohotlar va mamlakatimizning Jahon savdo tashkiloti (JST)ga a’zo bo‘lish jarayonini muhokama qildi.

Saida Mirziyoyeva ta’kidlashicha, yurtimiz taraqqiyotidagi ushbu muhim bosqichni Buyuk Britaniya hukumati to‘liq qo‘llab-quvvatlamoqda.

Uchrashuv ikki mamlakat o‘rtasidagi iqtisodiy va siyosiy hamkorlikni yanada mustahkamlashga xizmat qilishi kutilmoqda.

Eslatib o‘tamiz, avvalroq Saida Mirziyoyeva Yevropa tiklanish va taraqqiyot banki prezidenti bilan uchrashgan edi.