Fransiya sobiq prezidenti Nikolya Sarkozi besh yillik qamoq jazosini o‘tashni boshladi

Fransiya sobiq prezidenti Nikolya Sarkozi Liviya tomonidan saylov kampaniyasi uchun noqonuniy mablag‘ yig‘ish fitnasida ayblanib, besh yillik qamoq jazosini o‘tashni boshladi. Bu haqda Reuters xabar berdi.

21-oktabr kuni u Parijdagi La Sante qamoqxonasiga yetib keldi. Bu Ikkinchi jahon urushidan keyin sobiq fransuz rahbarlari qamoqqa tushgan ilk holatdir.

70 yoshli siyosatchi 2007–2012-yillarda mamlakatni boshqargan. U uyidan chiqib, rafiqasi Karla Bruni bilan mashinada qamoqxonaga yo‘l oldi. Yig‘ilganlar ularni Fransiya madhiyasini kuylab kuzatib qo‘yishdi.

Sarkozi o‘zini aybsiz deb hisoblaydi va ishni siyosiy sabablarga asoslangan deb atadi. X ijtimoiy tarmog‘ida e’lon qilgan murojaatida u shunday yozdi:

«Bugun qamoqqa olinayotgan kishi sobiq prezident emas — bu begunoh insondir».

Sud qaroriga ko‘ra, Sarkozi o‘ziga yaqin hamkorlari bilan birgalikda Liviya rahbari Muammar Qazzofiydan 2007-yilgi saylov kampaniyasi uchun noqonuniy mablag‘ olish sxemasini uyushtirgani uchun aybdor deb topilgan. Biroq u shaxsan mablag‘larni olgan yoki ishlatganlikda ayblanmagan.

Sarkozining advokatlari apellyatsiya shikoyati bilan bir qatorda erta ozodlik so‘rovi ham topshirganini ma’lum qildi. Ular bu masala bir oy ichida ko‘rib chiqilishi va agar rad etilmasa, sobiq prezident yil oxirigacha ozodlikka chiqishiga umid bildirdi.

Avvalroq Kursiv Uzbekistan Madagaskarda harbiy lider prezident lavozimini egallagani haqida xabar bergan edi.