Iqtisodiy tadqiqotlar va islohotlar markazi (ITIM) O‘zbekiston avtomobil bozorining sentabr oyidagi holati bo‘yicha yangilangan tahlilni e’lon qildi. Unga ko‘ra, ushbu oyda yengil avtomobillar savdosi 84,6 ming donani tashkil etgan bo‘lib, bu avgust oyiga nisbatan 6,4 foizga kam.
Birlamchi bozor
Yangi avtomobillar segmentida mavsumiy pasayish kuzatilib, savdo hajmi 15,2 foizga kamayib, 31,9 ming donani tashkil etdi. Shundan 27,4 ming donasi mahalliy ishlab chiqarilgan avtomobillar bo‘lib, bu avvalgi oyga nisbatan 16,1 foizga kam. Import qilingan yangi avtomobillar savdosi esa 4,5 ming donani tashkil etib, 8,9 foizga kamaydi.
Ikkilamchi bozor va elektromobillar
Sentabr oyida foydalanilgan avtomobillar segmentida 52,6 ming dona avtomobil sotilgan. O‘tgan oyda 7,8 ming dona elektromobil sotilgan – bu avgust oyiga nisbatan 21,6 foizga ko‘p va rekord natija hisoblanadi. Joriy yilning uchinchi choragida esa jami 20,7 ming dona elektromobil sotilgan bo‘lib, bu o‘tgan yilning shu davriga nisbatan 2,2 barobar ko‘pdir.
Eng katta o‘sish Toshkent shahri, Toshkent va Samarqand viloyatlarida qayd etilgan.
Elektromobillar savdosi:
| Oy nomi | Birlamchi bozor (import) | Ikkilamchi bozor | Jami sotilgan elektromobillar |
|---|---|---|---|
| Yanvar | 2 369 | 1 137 | 3 506 |
| Fevral | 2 190 | 1 165 | 3 355 |
| Mart | 2 816 | 1 739 | 4 555 |
| Aprel | 2 369 | 1 716 | 4 085 |
| May | 2 936 | 1 425 | 4 361 |
| Iyun | 2 786 | 2 010 | 4 796 |
| Iyul | 3 240 | 2 198 | 5 438 |
| Avgust | 3 540 | 2 723 | 6 263 |
| Sentyabr | 5 090 | 2 718 | 7 808 |
Eslatib o‘tamiz, Kursiv Uzbekistan UzAuto Motors Chevrolet Cobalt va Damas ishlab chiqarishni kamaytirgani haqida yozgan edi.
