GWM kompaniyasi tomonidan Haval H6L avtomobili haqida ma’lumotlar e’lon qilindi. Bu haqda CarNewsChina xabar bermoqda. Yangi model noyabr oyida taqdim etilishi rejalashtirilgan.
Texnik xususiyatlar
Haval H6L asosan Xiaolong Max modeliga asoslangan. Tashqi dizaynida bir qator o‘zgarishlar mavjud. Old panjarasi qayta ishlangan, yon havo kirish teshiklari kattalashtirilgan va korpus nisbatlarida kichik o‘zgarishlar kiritilgan. Ekranli «HAVAL» yozuviga ega LED chiroqlar old va orqa tomonlarda uzluksiz shaklda joylashgan.
Avtomobilning uzunligi 4800 mm, eni 1895 mm, balandligi 1730 mm. G‘ildirak bazasi esa 2810 mmni tashkil etadi. Bu ko‘rsatkichlar Xiaolong Max’dan biroz kattaroq, ammo salon hajmi deyarli o‘zgarmagan.
Salon qismi
Ichki qism markazida 14,6 dyuymli ekran, bosh proyektor (HUD), 64 rangli ambient yoritish tizimi, isitiladigan rul hamda massaj va ventilyatsiya funksiyalariga ega old o‘rindiqlar mavjud. Haydovchi o‘rindig‘i 8 yo‘nalishda elektr bilan sozlanadi, bel qismi esa 4 yo‘nalishda qo‘llab-quvvatlanadi.
Shuningdek, avtomobil 10 karnayli audio tizim, ikki qavatli shovqinga qarshi oynalar, ovozli boshqaruv, havo tozalash tizimi va 28 ta saqlash bo‘limi bilan jihozlangan. Orqa o‘rindiqlar bitta tugma orqali butunlay yotqizilishi mumkin.
Dvigatel liniyasiga 135 kVt quvvatga ega 1,5 litrli turbo va 175 kVt quvvatli 2,0 litrli turbo dvigatellar kiradi. Ikkalasi ham avtomatik uzatmalar qutisi bilan birlashtirilgan.
Haval H6L Xiaolong Max’ning benzinli versiyasini almashtiradi va brendning «H» seriyali shahar krossoverlari an’anasini davom ettiradi. «L» indeksi modelning biroz kattaroq o‘lchamga ega ekanini bildiradi.
Yangi model Xitoy bozorida noyabr oyida savdoga chiqadi va 100–150 ming yuan (taxminan $13,8–20,7 ming) oralig‘ida sotilishi kutilmoqda.
Eslatib o‘tamiz, Kursiv Uzbekistan nashri Haval Raptor avtomobilida suv to‘planish muammosi aniqlangani haqida yozgan edi.
