Aviasales.uz servisi so‘nggi uch yildagi kam bron qilingan yo‘nalishlarni tahlil qilib, O‘zbekistondan faqat bir marta chipta olingan mamlakatlarni aniqladi. Bu haqda kompaniya Kursiv Uzbekistan’ga ma’lum qildi.
Ta’kidlanishicha, bunda ro‘yxatga Serra-Leone, Jibuti, Kongo, Ruanda, Venesuela, Madagaskar, Barbados, Laos, Dominikan, Boliviya, Benin, Myanma, Peru, Ekvador, Nikaragua, Zimbabve, Shimoliy Makedoniya va Fiji kiritilgan.
Eng qimmat sayohat Nikaraguaga bo‘lgan – 10 kunlik biznes-klass safar qiymati qariyb 36 million so‘mni tashkil qilgan. Shunga o‘xshash narxdagi yana bitta sayohat Zimbabvega amalga oshirilgan. Kamdan-kam uchraydigan yo‘nalishlar orasida Dominikan Respublikasi va Nikaragua eng katta qiziqish uyg‘otdi – u yerga chiptalar tez-tez izlanardi, ammo faqat bir marta bron qilingan.
Aviasales.uz ma’lumotiga ko‘ra, bu mamlakatlarga to‘g‘ridan to‘g‘ri reyslar yo‘qligi, ko‘p o‘tirishli murakkab yo‘nalishlar va vizaning zarurligi sababli sayohatlar kam amalga oshiriladi. Shu bois ko‘pchilik hanuz Turkiya, BAA yoki Osiyo davlatlari kabi yaqin va arzon yo‘nalishlarni tanlaydi.
Nikaragua, Dominikan va Zimbabve esa hozircha «orzu sayohatlari» ro‘yxatida qolmoqda – ular haqida qiziqish katta, ammo borayotganlar juda kam.
Avvalroq 2025-yilning yanvar – avgust oylarida qariyb 5,2 million nafar o‘zbekistonlik turistik maqsadlarda chet elga safar qilgani xabar berilgandi. Joriy yilning sakkiz oyida O‘zbekiston fuqarolari eng ko‘p Qirg‘iziston (2,3 mln), Qozog‘iston (956 ming) va Tojikistonga (888 ming) sayohat qilgan.
