29-oktabr kuni Andijondagi Bobur Arena stadionida O‘zbekiston kubogining final uchrashuvi bo‘lib o‘tadi. G‘oliblik uchun «Paxtakor» va «Buxoro» klublari maydonga tushadi.
«Sherlar» yarim finalda Samarqandning «Dinamo» jamoasini penaltilar seriyasida 4:2 hisobida mag‘lub etdi. «Buxoro» esa Jizzaxning «So‘g‘diyona» klubidan 3:2 hisobida ustun kelib, hal qiluvchi bahsga yo‘l olgan edi.
Ma’lumot uchun, «Paxtakor» klubi O‘zbekiston kubogining 13 karra g‘olibi sanaladi. «Buxoro» esa hali turnirni biror marta ham yutmagan, bu buxoroliklar uchun ilk final sanaladi. Final uchrashuvi 18:30 da start oladi. G‘olib musobaqa chempioniga aylanadi.
2024-yili O‘zbekiston kubogi finalida «Andijon» va «Navbahor» ishtirokida vodiy derbisi guvohi bo‘lgan edik. Gollarga boy bo‘lgan bahsning ekstra taymlarida «Andijon» g‘alaba qozonib, o‘z tarixidagi ilk chempionlikni qo‘lga kiritgan edi.
Avvalroq Kursiv Uzbekistan musobaqa finalchilari aniq bo‘lgani haqida xabar bergan edi.
